Беларусь

Рэцэпт сямейнага шчасця


Колькі  розных вызначэнняў і эпітэтаў можна падабраць да, на першы погляд, простага слова “сям’я”! У кожнага ёсць пэўныя ўяўленні аб тым, як стварыць утульнасць у доме, як дасягнуць гармоніі ўзаемаадносін. Хоць і кажуць, што ўсе шчаслівыя сем’і шчаслівыя аднолькава, але ці так яно насамрэч атрымліваецца ў жыцці? Што неабходна сёння мужу і жонцы, каб назваць сваю сям’ю шчаслівай?

Уладзімір СЕНЬКАВЕЦ, загадчык кафедры БрДУ імя А.С. Пушкіна:
– Сям’я – гэта вельмі складаны механізм псіхалагічных узаемаадносін, матэрыяльных стасункаў і духоўнага камфорту. Шчасце тут  складаецца з індывідуальнага шчасця кожнага члена сям’і, яго здароўя, поспехаў, вучобы. На кожную драбніцу аднаго рэагуе ўся сям’я: радуецца, смуткуе, перажывае. Шчасце заключаецца ў наладжванні гарманічных адносін, якія грунтуюцца на ўзаемапавазе. І гэтыя адносіны трэба хацець пабудаваць.
Людміла і Віталь НІКІЦЮКІ, пенсіянеры:
–  Дзеці – вось галоўнае для сямейнага шчасця. Глядзець, як тваё дзіця робіць першы крок,  гаворыць першае слова… Толькі дзеля гэтага варта жыць. А яшчэ – узаемапаразуменне і павага. Такая сям’я будзе па-сапраўднаму шчаслівай.

Святлана ШЧЭРБА, выкладчык БрДУ імя А.С. Пушкіна:
– Я жыву  ў шлюбе ўжо 25 гадоў. З асабістага вопыту скажу: каб сям’я была шчаслівай, патрэбна каханне, бо без гэтага рамантычнага і светлага пачуцця не будзе ўзаемапаразумення, павагі. Але і яго аднаго недастаткова, бо можна сварыцца, мірыцца, а шчасця не будзе. Трэба прывыкаць да недахопаў членаў сям’і, прымаць іх  захапленні, якія табе зусім не падабаюцца. Неабходна павага: каб бацькі паважалі дзяцей, дзеці – бацькоў. Лічу, што жанчына павінна забяспечваць утульнасць і духоўную прастору ў доме, а мужчына – матэрыяльны дастатак.

Алена ТАРАН, інструктар па ёзе:
– Каб сям’я была моцнай, трэба вельмі многа маральнай працы. Ніяк не абысціся без жадання зрабіць сваіх блізкіх шчаслівымі і ўмення дараваць памылкі.
Запісала Сабіна ГАРАЕВА,
студэнтка БрДУ
імя А.С. Пушкіна.
Фота Ганны ІВАШЧАНКА,
студэнткі БрДУ
імя А.С. Пушкіна.

Рэцэпт сямейнага шчасця
Оцените статью

Добавить комментарий

Авторизация
*
*
Генерация пароля