Вялікі экран супраць малога

Мяркуючы па чэргах у касах кінатэатраў, моладзь з ахвотай глядзіць кіно  на вялікіх экранах. Аднак ёсць і аматары прагляду фільмаў дома. Хтосьці выбірае сеанс у шумнай вялікай кампаніі, а камусьці бліжэй да сэрца баўленне часу перад экранам тэлевізара ці камп’ютара з кубкам кавы, напрыклад. Дзе лепш атрымліваць асалоду ад прагляду кіно: дома ці ў кінатэатры?
Любоў ПАХОМАВА, намеснік начальніка аддзела арганізацыйнай, прававой і кадравай работы абласнога камітэта прыродных рэсурсаў і аховы навакольнага асяроддзя:
– Кінатэатр лепш наведваць у выхадныя, у буднія ж дні можна абмежавацца дамашнім праглядам. Для цікавых прэм’ер, безумоўна, больш падыходзіць вялікі экран, ну, а старыя савецкія камедыі, гістарычныя і біяграфічныя стужкі, якія падабаюцца асабіста мне, можна паглядзець і седзячы на канапе з кубкам кавы ў руцэ. Дарэчы, фільм “Брэсцкая крэпасць” я таксама глядзела дома.
Ірына ЗАМАРОЗНАЯ, начальнік аддзела па справах моладзі аблвыканкама:
– Усю глыбіню ўражанняў ад фільма перадаюць толькі вялікія экраны. Таму лепш хадзіць у кінатэатр. Аднак на такія паходы незаўсёды ёсць час і магчымасць, таму некаторыя кінапрэм’еры можна ладзіць і ў дамашніх умовах.
Таццяна ВЕНСКО, другі сакратар абкама ГА “БРСМ”:
– Мне падабаецца глядзець кіно на вялікіх экранах. Сёння брэсцкія кінатэатры маюць добрае абсталяванне, таму ўспрыняцце ад прагляду больш эмацыянальнае, чым ад дамашняга кінасеанса. Ведаю, што навукоўцамі ўжо распрацаваны і дамашнія кінатэатры з функцыяй 3D, аднак яны нам пакуль недаступныя.
Запісалі Вольга СВІРЫДОВІЧ, “НТ”,
Ніна ЛЕАНАВЕЦ ,“НТ”.
Фота Юрыя МАКАРЧУКА, “НТ”.