З чым пойдзем на сельскія сходы?

На апошняй сесіі раённага Савета дэпутатаў народныя выбраннікі Прыбужжа абмеркавалі пытанне “Аб рэалізацыі заўваг і прапаноў, выказаных грамадзянамі ў ходзе сельскіх сходаў у сакавіку-красавіку 2010 года, і задачах органаў мясцовага кіравання і самакіравання па падрыхтоўцы і правядзенні сельскіх сходаў грамадзян у сакавіку-красавіку 2011 года”
Летась на сельскіх сходах народным выбраннікам было адрасавана каля тысячы пытанняў. Што хвалявала прыбужцаў год таму? Стан дарог, рамонт прыпыначных пунктаў і ўстаноўка на іх навесаў, рамонт жылога фонду, будаўніцтва і рамонт сетак водазабеспячэння і каналізацыі, цепласетак, арганізацыя вывазу тэхнічна-бытавых адходаў, асвятленне вуліц і замена лініі электрасетак. Узнімаліся таксама пытанні рамонту магазінаў і добраўпарадкавання сумежных тэрыторый, некаторыя тычыліся змянення графіка ці маршруту руху рэйсавых аўтобусаў і маршрутных таксі.
Як вырашаліся яны на працягу года? Што выканана, а што зноў павісла ў паветры? І хто ў гэтым вінаваты? Даць адказ на гэтыя пытанні спрабавалі як самі народныя выбраннікі, так і запрошаныя на сесію кіраўнікі абласных і раённых службаў.
Большая частка зваротаў, з якімі ішлі на сходы грамадзяне летась, адзначыў у сваім выступленні старшыня раённага Савета дэпутатаў Аляксандр Саланевіч, выкананы. Некаторыя знаходзяцца на кантролі ў пассельвыканкамах, 174 – адрасаваны службам раёна. Частка з іх не выканана па той прычыне, што многія раённыя службы з’яўляюцца філіяламі абласных і самастойна не могуць прымаць рашэнняў.
Не ўсё зроблена дарожнай службай. Так, да гэтай пары не абсталяваны пяць аўтобусных прыпынкаў. Не вырашана таксама пытанне добраўпарадкавання чыгуначных прыпынкаў у вёсках Збунін, Прыбарава, Селяхі і Ліпінкі. Нямала праблем яшчэ ў рабоце жыллёва-камунальнай гаспадаркі, у медыцынскім абслугоўванні насельніцтва, у рабоце службы электрасетак.
Дэпутат раённага Савета дэпутатаў па Збірагаўскай выбарчай акрузе №16, начальнік ДРБУ-138 Міхаіл Семянюк далажыў удзельнікам сесіі пра тое, што большая палова пытанняў, якія тычыліся работы дарожнай службы на леташніх сельскіх сходах, вырашаны. Складзены таксама графік грэйдзіравання дарог – яно будзе праводзіцца два разы ў месяц. На што тут жа адрэагаваў старшыня райвыканкама Уладзімір Мацука: “Аднаго грэйдара на раён мала. Сёння патрэбны набор спецыяльнай тэхнікі. А саміх грэйдарыстаў неабходна навучыць працаваць прафесійна, каб гэтую работу выконвалі якасна, а не рабілі канавы, у якія сцякае вада. Асабліва гэта тычыцца вуліц унутры населеных пунктаў…”
Свой погляд на паляпшэнне работы жыллёва-камунальнай гаспадаркі выказаў дырэктар Брэсцкай ЖКГ Аляксей Скварцоў. Санітарная ачыстка населеных пунктаў, на яго думку, павінна праводзіцца тэхнічнымі сродкамі, а ад кантэйнераў у вёсках неабходна пазбавіцца (што выклікала ў зале неадназначную рэакцыю). І якасць вады вымушае жадаць лепшага. Праўда, у гэтым кірунку камунальнікі працуюць: летась у Чэрнях уведзена ў строй станцыя абезжалезвання вады. Неўзабаве такая ж станцыя будзе ў Знаменцы, да канца года – у Кавярдзяках. А да 2015 года па праграме “Чыстая вада” такія аб’екты пабудуюць ва ўсіх буйных населеных пунктах раёна.
Галоўны ўрач гарадской бальні-цы №2 Віталь Федарук расказаў пра тое, якія наказы і прапановы грамадзян, выказаныя ў адрас медыцынскай службы, выкананы, а якія
пакуль што не ўдалося ажыццявіць і чаму. Напрыклад, арганізаваць пастаянныя выезды медработнікаў у населеныя пункты. Тады, па словах Віталя Андрэевіча, не будзе каму прымаць пацыентаў на ФАПах. Не хапае медыцынскіх кадраў. Каб неяк вырашыць гэтае пытанне, ён папрасіў настаўнікаў-дэпутатаў арыентаваць школьнікаў на прафесію медыка.
Калі гаварыць пра такія пытанні, як добраўпарадкаванне, эканомія энергарэсурсаў, дык над іх вырашэннем павінны працаваць і самі жыхары, зазначыў Уладзімір Мацука. Задача дэпутатаў, старшынь сельскіх Саветаў і тых жа стараст – арганізаваць людзей. І тады многія праблемы знімуцца самі. Парадак неабходна наводзіць сумесна, прыцягваць да гэтага грамадскія арганізацыі, шукаць інвестараў, якія б укладвалі сродкі як у развіццё вытворчасці шляхам стварэння малога і сярэдняга бізнесу, так і ў вырашэнне сацыяльна-эканамічных праблем населеных пунктаў.
А абласным службам, зазначыў у сваім выступленні на сесіі старшыня Пастаяннай камісіі Савета Рэспублікі Нацыянальнага сходу Рэспублікі Беларусь па эканоміцы, бюджэце і фінансах Вадзім Папоў, трэба  пераходзіць на самафінансаванне. Гэта прымусіць іх працаваць якасней і адказней, бо тады будзе развівацца прыватны сектар бытавых паслуг, што створыць здаровую канкурэнцыю.
Надзея ЯЦУРА, “НТ”,
Брэсцкі раён.