Ансамбль гарманістаў “Картузяне” стаў лаўрэатам I ступені ХІV Міжнароднага фестывалю народнай музыкі “Звіняць цымбалы і гармонік”

Ансамбль гарманістаў “Картузяне” Бярозаўскай дзіцячай школы мастацтваў стаў лаўрэатам I ступені ХІV Міжнароднага фестывалю народнай музыкі “Звіняць цымбалы і гармонік” у г. Паставы Віцебскай вобласці

Бярозаўская дэлегацыя была адзінай ад Брэстчыны на пастаўскім фэсце народнай музыкі. Надзвычай удала выступілі музыканты ў традыцыйным конкурсе фестывалю “Хто каго?..” з музычнай замалёўкай “Іграйце, музыкі!” і сучаснымі прыпеўкамі. “Картузяне” адрозніваюцца эмацыянальнасцю, артыстычнасцю, разняволенасцю на сцэне, бо маюць багаты сцэнічны вопыт. Толькі за апошнія тры гады ансамбль удзельнічаў больш чым у 100 канцэртах, шматлікіх фестывалях і конкурсах. Ён двойчы лаўрэат абласных свят “Грай, гармонік, звіні, прыпеўка”, адкрытага фестывалю-конкурсу юных музыкантаў “Пралескі”, рэгіянальнага фестывалю юных музыкантаў “Сымон-музыка”, удзельнік рэспубліканскіх фестываляў нацыянальных культур “Суквецце культур” у Брэсце і Гродна, а таксама горадзе Поставы.
Заснавальнік і мастацкі кіраўнік “Картузян” Ігар Сірычнік плённа працуе па прапагандзе музычнага мастацтва, народнай музыкі і народных інструментаў. Пераважная большасць аранжыровак і інструментовак кампазіцый з рэпертуару калектыву выканана ім самім, а набыткі ансамбля – гэта вынік яго асабістых намаганняў і працавітасці дзяцей.
Карыснымі для бярозаўскіх музыкаў сталі шматлікія знаёмствы з удзельнікамі фестывалю з Расіі,  Ізраіля, Кітая, Польшчы, Латвіі, Літвы. Яркія ўражанні ў дзяцей засталіся ад выступленняў Нацыянальнага акадэмічнага народнага аркестра Рэспублікі Беларусь імя І. Жыновіча, Нацыянальнага акадэмічнага народнага хору Рэспублікі Беларусь імя Г. Цітовіча і іншых гасцей свята.
“Картузяне” прынялі ўдзел у гала-канцэрце і паказалі канцэртную праграму ў вёсцы Вярэнькі Пастаўскага раёна. Публіка вітала нашых артыстаў стоячы.
Ніна КРУКОВІЧ,
г. Бяроза.