І запаліліся новыя зоркі…

25 лістапада адбыліся сёмыя паэтычныя чытанні “Лунінская восень” і ў чацвёрты раз уганараваны лаўрэаты абласной літаратурнай прэміі імя Уладзіміра Калесніка
…Залатая, шапатлівая восень зноўку таямніча зашамацела пад нагамі, лёгка загайдалася ў паветры жоўта-барвовай лістотай. У каторы раз яна зачароўвала ўдзельнікаў абласнога свята, якое, па ўсім відаць, надзейна прапісалася на Лунінеччыне – у Лунінскай школе і райцэнтры.
У паэтычных чытаннях “Лунінская восень” – асаблівы каларыт, палескі. Разам з адкрытасцю, пранікнёнасцю кожны раз у наваколлі нібыта лунала штосьці нязведана-загадкавае. А можа, гэтак і павінна быць: бо колькі існуе чалавецтва – столькі яно пазнае свет, адкрывае нязведанае, заваёўвае вяршыні ды стварае цуд з дапамогай магічнага Слова…
Толькі вымаві знаёмае, сотні раз чутае – зямля пад белымі крыламі – і кожны адукаваны беларус удзячна ўзгадае слыннага пісьменніка Уладзіміра Караткевіча. А ўчора яму б споўнілася 80 гадоў – так што зусім невыпадкова “Лунінская восень” з’явілася своеасаблівым прысвячэннем таленту Уладзіміра Караткевіча.
Яркім промнем сонейка на фоне глыбокай восені стала сустрэча лунінскіх школьнікаў з пісьменнікамі Берасцейшчыны на чале са старшынёй абласнога аддзялення Саюза пісьменнікаў Беларусі Анатолем Крэйдзічам і сталічнымі гасцямі, сярод якіх традыцыйна былі нашы землякі – вядомыя паэты, гожыя людзі Раіса Баравікова і Алесь Бадак. Творчыя асобы не проста выступалі перад школьнікамі –
яны разважалі, дзяліліся і гэтак чыталі паэтычныя радкі – нібыта маліліся роднаму слову…
Паэт Андрэй Мазько (ён жа – намеснік старшыні Лунінецкага райвыканкама) сцвярджаў, што творчы конкурс заўжды акрыляе творчых людзей. І дае магчымасць атрымаць адказ на адвечнае пытанне: што ж робіць улада для развіцця творчасці маладых? Берасцейцам пашанцавала, і ў гэтай сувязі не адзін раз  узгадвалася імя старшыні аблвыканкама Канстанціна Сумара, які ахвотна падтрымаў добрыя ідэі. На думку галоўнага рэдактара часопіса “Нёман” Алеся Бадака, такога ўзроўню літаратурных чытанняў у Беларусі няма. “А моц “Лунінскай восені”, яе крылы – гэта вы”, – сказаў пісьменнік з Пінска Мікалай Елянеўскі  прысутным школьнікам.
Нібыта ў пацвярджэнне сказанага, крыху пазней, ужо ў Лунінцы, мы ўсе сталі сведкамі трыумфу юных талентаў – пераможцаў абласнога конкурсу творчых і літаратурна-даследчых работ “Доблесць продкаў – нашчадкам у спадчыну!”. На сцэну кінатэатра “Кастрычнік” узнімалася Дар’я Гарбацкая з Адрыжынскай СШ Іванаўскага раёна, Настасся Сідорка з СШ №3
Жабінкі, Ганна Харкевіч з ліцэя г. Лунінца, Алена Піўнюк і Марыя Варабей з брэсцкіх СШ №№27 і 33, Яніна Раманчук з СШ №3 г. Іванава. Вось толькі шкада, што сярод дзявочай пераможнай квецені чамусьці не аказалася ніводнага юнака…
Намеснік старшыні абл-выканкама Леанід Цупрык глыбока перакананы, што сёння ўсе мы павінны дбаць не толькі пра матэрыяльны дабрабыт, але і духоўны стан грамадства. Ён з бачным задавальненнем уручыў лаўрэатам дыпломы і прэміі імя Уладзіміра Калесніка. У галіне паэзіі імі сталі двое: Надзея Парчук за кнігі “Раскрыліўся бусел над хатай…” і “Зарунее жыта зноў…” ды Віктар Вабішчэвіч, аўтар зборніка “Уражанне”. Сярод празаікаў адзначаны Аляксандр Валковіч за кнігі “Алеся. Белавежскія сны” і “Бяроза белая. Бяроза чорная”. А ў дзіцячай літаратуры вылучана кніга п’ес “Казкі навагодняга лесу”, напісаных Аленай Савасціной (творчы псеўданім – Зоя Гарадзецкая)…
На думку брастаўчаніна, кандыдата філалагічных навук Уладзіміра Сенькаўца, калі жыве душа – чалавеку патрэбна мастацкае слова. А такія літаратурныя фэсты, як гэты, вядома ж, сілкуюць душу, натхняючы яе на творчасць. І тады на літаратурным небасхіле запальваюцца новыя зоркі. А што гэта так, сведчыць прыемная навіна ад сталічных гасцей: рыхтуецца ў свет паэтычны зборнік мінулагодняй пераможцы абласнога дзіцячага конкурсу, студэнткі БДУ Маргарыты Латышкевіч.
Дык ззяйце ж, зоркі, над зямлёй Берасцейскай – ярка і агніста, асвятляйце людзям шлях да духоўнасці!..
Галіна МАЗІНА, “НТ”,
Лунінецкі раён.