Суп “Марскі капрыз”

ад  Людмілы ЮНЧЫК, галоўнага спецыяліста ўпраўлення сельскай гаспадаркі і харчавання Івацэвіцкага райвыканкама:
– Гатаваць люблю. Калі дзеці былі малыя, заўсёды старалася пачаставаць іх чым-небудзь смачненькім. З жаданнем чарую на кухні і зараз, калі яны ўжо жывуць асобна, але на выхадныя прыязджаюць дахаты, каб паласавацца  маімі стравамі, прыгатаванымі  з натуральных дамашніх прадуктаў. Так-так, я не абмовілася! У нас з мужам ёсць падсобная гаспадарка, таму і мы маем практычна ўсе свае прадукты харчавання: бульбу, гародніну, зяленіва, мяса і нават малако. Перавагу муж і дзеці аддаюць мясным стравам. Таму, калі збіраемся ўсе разам, часта  тушу качку з грэчкай або рысам з прыправамі.
Палюбіўся маім сямейнікам і суп са скумбрыі, які мы назвалі “Марскі капрыз”. Чаму так? Магчыма таму, што гатуецца ён на аснове марской рыбы. Яго рэцэпт і хачу прапанаваць чытачам “НТ”.
На трохлітровую каструлю нам спатрэбяцца: 4 сярэднія бульбіны, 1 морква, 1 цыбуліна, 1 скумбрыя сярэдняй велічыні, 1 сталовая лыжка з верхам манкі, соль, спецыі.
Ачышчаную бульбу рэжам на кубікі, моркву надзіраем на буйной тарцы, цыбуліну здрабняем саломкай і варым у вадзе амаль да гатоўнасці. Скумбрыю чысцім, мыем, наразаем упоперак на кавалкі, кладзём у суп, солім па смаку і варым яшчэ дзесяць мінут.
За пяць мінут да гатоўнасці ўсыпаем манку, асцярожна перамешваем, дадаём лаўровы ліст, некалькі гарошын чорнага перцу. Пры падачы на стол суп раю аздобіць зяленівам.
Прыемнага апетыту!