Беларусь

Пазнаючы гісторыю, ствараць будучыню


У конкурсных эсэ брэсцкія школьнікі выказалі свае патрыятычныя пачуцці да роднай краіны
Неяк давялося пачуць меркаванне: маўляў, гаварыць пра любоў да Радзімы – архаізм, бо словы такія нямодныя. Падумалася: няўжо і сапраўды патрыятычных пачуццяў сучасная моладзь саромеецца?
– Чаго ж тут саромецца? – здзівілася старшыня Маскоўскай раённай арганізацыі рэспубліканскага грамадскага аб’яднання “Белая Русь” Марыя Гладун. – Патрыятычныя пачуцці ўпрыгожваюць чалавека і ўслаўляюць краіну. Яны блізкія і зразумелыя сучаснай моладзі.
У якасці доказу Марыя Міхайлаўна распавяла пра акцыю “Гэта наша зямля, гэта мы – беларусы”, якую правяла грамадская суполка. Яе мерапрыемствы ў абласным цэнтры падтрымалі і сталыя людзі, і моладзь, і дзеці. Напрыклад, старшакласнікі ахвотна паўдзельнічалі ў аднайменным конкурсе эсэ.
Здаваласая б, тэма ва ўсіх адна, а якія розныя атрымаліся творчыя работы! Школьнікі па-рознаму ўбачылі родную зямлю і расказалі кожны па-свойму, хто такія беларусы. Аказалася, што для сучасных падлеткаў (у конкурсе эсэ ўдзельнічалі вучні 8 – 11 класаў) нечужыя такія паняцці, як Айчына, патрыятызм, Беларусь. Яны напісалі і пра гераічнае мінулае свайго народа, і пра слынных беларусаў, і пра сённяшнія дасягненні рэспублікі, і пра свае надзеі і мары, якія звязваюць з Радзімай, – моцнай і квітнеючай.
Журы заўважыла, што школьнікі ўдала спалучылі ў эсэ гісторыю і сучаснасць, дакладна выказалі свае адносіны да беларускай дзяржавы, роднай мовы, на якой большасць і напісалі творчыя работы. Лепшыя былі адзначаны дыпломамі, грашовымі прэміямі, падарункамі: Кацярына Мшар, дзесяцікласніца САШ №10 (1-е месца), дзевяцікласнік Аляксей Таболіч з САШ №15 (2-е месца), вучань САШ №31 Даніла Кулеша (3-е месца). Заахвочвальныя прызы атрымалі Эдвард Максімовіч, Марыя Карпіевіч, Вераніка Лошык, Мая Парфеявец, Вікторыя Лахадыр.
Пазнаючы гісторыю, мы можам тварыць будучыню. Нашы маладыя сучаснікі гэта разумеюць. І як аптымістычна гучыць радок з эсэ Марыны Крук: “Дык будзь жа шчаслівым, мой зямляк-беларус!” А я дадам: памятай пра Радзіму і не хавай свае патрыятычныя пачуцці.
Дзмітрый ШЫФЕРШТЭЙН,
студэнт БрДУ імя А.С. Пушкіна.

Добавить комментарий

Авторизация
*
*
Генерация пароля