Служыць інтарэсам Айчыны, абараняць яе ад ворагаў, быць патрыётамі – гэтаму вучаць ветэраны сучасную моладзь

Брэсцкая гарадская арганізацыя Беларускага грамадскага аб’яднання ветэранаў правяла ў аўторак у Жабінкаўскім раёне выязны семінар “Аб ролі захавання памяці подзвігаў абаронцаў Айчыны ў маральна-патрыятычным выхаванні моладзі”. У ім удзельнічалі ветэраны і сведкі Вялікай Айчыннай вайны, былыя партызаны, ветэраны працы.
Яны пабывалі ў вёсцы Старое Сяло – тут у гады вайны дзейнічаў партызанскі атрад Міхаіла Чарнака. Гэты энергічны і смелы чалавек, выдатны камандзір загінуў зусім маладым – у 32 гады. Сёння ў яго гонар у вёсцы стаіць помнік, да якога брэсцкія ветэраны ўсклалі кветкі, а потым некаторыя з іх успаміналі цяжкі час ваеннага ліхалецця.
Наступныя пункты прыпынку на маршруце семінара – вёска Азяты, месца расстрэлу 102-х мірных жыхароў, і мемарыял “Драмлёва”, дзе фашысты спалілі 196 чалавек. Вёска так і не адрадзілася. Удзельнікі семінара схілілі галовы ў знак памяці аб ахвярах фашызму.
Але не толькі для таго, каб ушанаваць загінулых, сустрэліся ветэраны. Яны пагутарылі з моладдзю, расказалі калегам па ветэранскім руху, што ўжо зроблена, а што – у планах. На іх думку, вельмі важна, каб подзвіг і гераізм продкаў заставаўся ў памяці і ў сэрцах маладых. Таму вырашана стварыць агітацыйна-прапагандысцкую групу, удзельнікі якой будуць расказваць вучням школ, навучэнцам каледжаў і тэхнікумаў аб крывавых днях вайны, выхоўваць моладзь на праўдзе гісторыі.
Сабіна ГАРАЕВА, “НТ”,      Жабінкаўскі раён.