Новы наркотык

Залежнасць ад сусветнай павуціны захапіла не толькі моладзь, але і людзей сталага ўзросту
Гіперпапулярны сайт vkontakte.ru  – сапраўдны віртуальны наркотык сённяшняга дня. Калі раней сусветнай павуцінай хварэлі пераважна толькі маладыя людзі, дык такія сайты, як “Аднакласнікі” і “У кантакце” заразілі непераадольнай залежнасцю і людзей больш сталага ўзросту.
Ідэя аб’яднаць на адной старонцы пад дзевяццю запаветнымі літарамі агульнай назвы 61 мільён чалавек сама па сабе ўжо не нясе нічога добрага. Усе жадаюць вылучыцца і стаць індывідуальнасцю, але ж нічога, акрамя слоў “Добро пожаловать, нас уже 107 905 031”, не атрымліваецца.
Такія сайты становяцца “кілерамі” многіх паняццяў. Напрыклад, дружбы. Раней, каб стаць сябрамі, трэба было па-сапраўднаму ведаць чалавека. Цяпер жа дастаткова націснуць на сінюю ўкладку “Дабавіць у сябры”. І так “дабавіць”, “дабавіць”… Вы толькі ўслухайцеся! Набыццё сяброў стала нейкім спортам: цяпер пры знаёмстве не пытаюцца, якое марожанае ты любіш, а – ці ёсць у цябе старонка “У кантакце”. Мы пачынаем калекцыянаваць сяброў. Вельмі часта наведвальнікі сайта нават не ведаюць і паловы сваіх віртуальных таварышаў.
Мы замянілі звычайныя ўсмешкі смайламі – англійскімі эквівалентамі – усяго толькі дужкамі, якія не маюць ніякага сэнсу. Дзе ж тады эвалюцыя чалавека, калі такія паняцці як усмешка становяцца сёння рудыментамі і замяняюцца значкамі? Такія сайты ў прамым сэнсе гэтага слова забіваюць жывыя зносіны. Мы думаем, што ведаем пра чалавека ўсё, толькі прачытаўшы яго старонку. У перапісцы ўяўляем яго такім, якім бачым на аватары. Хіба гэта ўжо само па сабе не зневажальна?
“У кантакце” так проста памяняць статус! Але ці ёсць нешта такое ў рэальным жыцці, што было б гэтак жа проста змяніць, націснуўшы на “enter”?
Вось і атрымліваецца, што сайт быццам бы і віртуальны (здаецца, там усяго толькі аватары, каментарыі, смайлы), але жыццё – сапраўднае. Мы губляемся ў віры, які і не лічым жыццём, называючы гэта толькі забаўкай. Але гэтая забаўка забірае ў нас рэальнасць!
Сёння спіс наркотыкаў можа смела папоўніць новы “прэпарат” – vkontakte.ru, які можна ўпэўнена паставіць па сіле ўздзеяння ў групу найбольш небяспечных. Людзей палохаюць такія словы, як “гераін”, “какаін”. Чаму ж выраз “vkontakte” нас не палохае? Гэты наркотык не менш моцны. Бо нават усе сімптомы супадаюць: спачатку эйфарыя, санлівасць, няпамятлівасць, чырвоныя вочы, потым – страта адчування рэальнасці, адрыў ад жыцця, залежнасць.
Я таксама раней сядзела на гэтым “наркотыку”. Вярталася са школы і тут жа, нават не пераапранаючыся, загружала ўжо знаёмую старонку. Таксама чакала невядома чаго, праглядаючы паведамленні, шукала знаёмых на нейкіх бессэнсоўных форумах, чытала каментарыі, “дабаўляла” сяброў.
Але, напэўна, мне пашанцавала. У мяне проста ў адзін цудоўны дзень перастаў загружацца гэты сайт. І залежнасць прайшла! Тое, што аддавала яму, стала аддаваць у сапраўднае жыццё.
Вось толькі страчанага часу не вярнуць. Спадзяюся, калі-небудзь гэты “чароўны” сайт перастане існаваць. І мільёны людзей зноў выйдуць на вуліцы, зноў пачнуць жыць у рэальным жыцці, а не на нейкіх віртуальных старонках.
Паліна ВЕСЯЛОВА,
клуб журналістыкі Бярозаўскага цэнтра
пазашкольнай работы.