Альшаны называюць самай вялікай вёскай, самай багатай і самай праблемнай…
Ці лёгка тут кіраваць? Пра гэта гутарым са старшынёй Альшанскага сельвыканкама Віктарам ГАПКО.
– Віктар Анатольевіч, адным з галоўных кірункаў дзейнасці сельскага Савета з’яўляецца навядзенне парадку на зямлі. Як справы з добраўпарадкаваннем у Вашых уладаннях?
– Пытанне навядзення парадку, бадай, самае няпростае. Таму яно ў нас пастаянна на кантролі. Распрацаваны мерапрыемствы па добраўпарадкаванні населеных пунктаў сельсавета, створана рабочая група. За кожнай арганізацыяй, установай, прадпрыемствам, камерцыйнай структурай замацавана прылягаючая тэрыторыя.
– І ўсё выконваеце згодна з графікамі і планамі? Няўжо няма праблем?
– Асноўная наша праблема – утрыманне могілак. Іх своечасова не прыбіраюць, яны зарастаюць бур’яном. На жаль, жыхары Альшан не лічаць неабходным утрымліваць у чысціні магілкі родных. Смецце і вянкі выкідваюць каля агароджы, а не ў адведзеных для гэтага месцах. Таму мы замацавалі могілкі за праваслаўнай царквой, дзяржаўнымі арганізацыямі, царквой хрысціян веры евангельскай.
А яшчэ вывешваем аб’явы з просьбамі да грамадзян вёскі аб навядзенні парадку, паштальёны разносяць паведамленні з газетамі па дамах, дзецям у школе раздаём паведамленні, у дзіцячым садку кожны з бацькоў атрымлівае лісток з напамінкам аб добраўпарадкаванні прыдамавых тэрыторый. Аб’явы аб уборцы вуліц ад дроў, смецця, сена, саломы робім на сходах у царкве хрысціян веры евангельскай. Аднак некаторыя проста ігнаруюць патрабаванні сельвыканкама. Ды не толькі прадпісанні, але і пратаколы. Не ўсе грамадзяне заплацілі штрафы. Мы перадалі іх справы ў суд, але і суд утрымаў штрафы толькі з пенсіянераў і працуючых. А непрацуючыя застаюцца непакаранымі…
– А ці наладжаны ў вёсцы цэнтралізаваны вываз смецця?
– Так. З мая мінулага года. Аднак зараз узнікаюць праблемы па аплаце. Ёсць вуліцы, на якіх смецце не збіраецца, а аплата налічваецца. Вадзіцель працуе без грузчыка, таму, калі гаспадара няма дома, смецце так і застаецца на месцы.
– Працягласць вуліц вёскі Альшаны – больш за 100 кіламетраў – гэта вялізная адлегласць…
– Калі дакладней, то 117 вуліц і завулкаў складаюцца ў 102 кіламетры. Усе яны перададзены на баланс ДРБУ-141. У гэтым годзе заасфальтаваны вуліцы Чкалава, Цэнтральная, частка Вішнёвай і Высокай, зроблена тратуарная дарожка на вуліцах каля новай школы. Добраўпарадкоўваюцца вуліцы Сасновая, Лугавая, Слаўная, Калгасная, Садовая, Свярдлова, Церашковай, Высокая, Вячэрняя. Многія вуліцы патрабуюць грэйдзіравання і ямачнага рамонту. Працягваецца газіфікацыя. У бліжэйшы час прыродны газ будзе ісці па вуліцах Гагарына, Заазёрнай, Чкалава, Базарнай, Набярэжнай, ва ўрочышчах Сад, Сосны, Дубы. Таксама сёлета плануецца газіфікаваць урочышча Сілягі, цэнтр Альшан і вёску Сямігосцічы. Пракладваем водаправод да кожнага дома альшанцаў.
– А як з асвятленнем вуліц?
– Асветлены цэнтральныя вуліцы і прылягаючыя да іх, а таксама вуліцы ў новых забудовах. Летась спажыта больш за 100 тысяч кілават электраэнергіі на суму больш за 46 мільёнаў рублёў.
– Ці ёсць у старшыні сельвыканкама асаблівыя пажаданні да людзей?
– Вельмі хочацца, каб Альшаны былі не толькі самай вялікай і багатай, але і самай прыгожай, самай чыстай і ўтульнай вёскай. Зрабіць гэта мы зможам толькі агульнымі намаганнямі. Дзяржава ў нашу вёску ўкладвае значныя сродкі. Мы маем адну з самых прыгожых школ у раёне, 1 верасня адчыніла дзверы яшчэ адна, а таксама дзіцячы сад, паступова асфальтуем вуліцы, праводзім газіфікацыю і водаправод. Дык давайце разам, паважаныя землякі, уладкуем парадак на нашай зямлі!
Гутарыла Таццяна СЕГЕН,
Столінскі раён.