Беларусь

Шчырыя адказы на смелыя пытанні


Валерый Гапееў прэзентаваў сваю новую кнігу “Урокі першага кахання”
Кнігу “Пастка для рыцара” Валерыя Гапеева  гэтак жа цяжка “злавіць” у бібліятэцы, як і знакамітага “Гары Потэра”. Публікацыі ж аповесцей у часопісе “Маладосць”,  якія ўвайшлі ў новую кнігу аўтара “Урокі першага кахання” (выдавецтва “Літаратура і Мастацтва”, серыя “Пераходны ўзрост”, 2010 год), сталі сапраўднай падзеяй і выклікалі хвалю вострых водгукаў – ад хвалебных да зневажальна-абураных.
Ацэнкі розняцца, але прыхільнасць  самай капрызнай, нечытаючай (тым больш па-беларуску!) чытацкай аўдыторыі – падлеткаў, старэйшых школьнікаў – відавочная. Як і той факт, што Валерый Гапееў застаўся сам-насам са сваімі не па гадах дарослымі і не па-даросламу наіўнымі чытачамі, таму  што лідарства нашага земляка ў галіне літаратуры для дзяцей і падлеткаў нікім не аспрэчваецца. Гэтая ніша сучаснай беларускай літаратуры пустуе. Нібыта дзеці не праходзяць больш праз пераходны ўзрост, нібыта яны не чакаюць адказаў на свае смелыя пытанні.
У абласной бібліятэцы імя М. Горкага 3 сакавіка на прэзентацыі  кнігі “Урокі першага кахання”  стала зразумела: аўтар і яго чытачы гавораць на адной мове, жывуць на адной хвалі і існуюць у адной віртуальнай прасторы. Для дарослых жа, як прысутных на сустрэчы, так і для бацькоў  увогуле, Валерый Гапееў выступіў у ролі перакладчыка слэнгу маладых, псіхолага падлеткавых “хвароб” і шчырага субяседніка.
“Адкуль Вы так дакладна  ведаеце, як мы насамрэч жывём і што нас хвалюе?” – гэтае пытанне, якое задаў чытач-старшакласнік, пагадзіцеся, лепшая рэцэнзія на кнігу.
Алёна САЦУТА, “НТ”.

Добавить комментарий

Авторизация
*
*
Генерация пароля