Падведзены вынікі VІ Рэспубліканскага конкурсу творчых работ па сацыяльна-гуманітарных навуках

Перамога міласэрнасці
Падведзены вынікі VІ Рэспубліканскага конкурсу творчых работ навучэнцаў і студэнтаў па сацыяльна-гуманітарных навуках “Вялікая Перамога ў нашай памяці жыве”.
Дыпломам першай ступені Міністэрства адукацыі Рэспублікі Беларусь узнагароджаны навучэнка 4 курса Брэсцкага дзяржаўнага медыцынскага каледжа Вераніка Галавач і яе кіраўнік Святлана Мурына. У рабоце-пераможцы аўтары расказалі пра работу атрада “Міласэрнасць”, які створаны пры навучальнай установе.
Алімпійцы плюс вайскоўцы
Прадстаўніцтва Нацыянальнага алімпійскага камітэта Рэспублікі Беларусь у Брэсцкай вобласці арганізавала сустрэчу спартсменаў-алімпійцаў з ваеннаслужачымі 38-й асобнай мабільнай брыгады.
Вайсковую часць наведалі Юлія Бічык, Наталля Гелах, Яраслава Паўловіч, Вадзім Лялін, Аляксандр Казубоўскі і галоўны трэнер Нацыянальнай каманды Беларусі па веславанні акадэмічным Уладзімір Сінельшчыкаў. Удзельнікі мерапрыемства пабывалі на палігоне, паўдзельнічалі ў паказальных стрэльбах, пазнаёміліся з асаблівасцямі службы і быту брыгады. На памяць алімпійцы пакінулі вайскоўцам наглядную агітацыю і сімволіку НАК Беларусі.
Адрас клопату
У межах рэспубліканскага месячніка Беларускага таварыства Чырвонага Крыжа, які праходзіць у маі, у вобласці пачалася акцыя “Адрас клопату – адзінокія сэрцы”.
Супрацоўнікі таварыства і яго валанцёры збіраюць сродкі для аказання дапамогі адзінокім людзям. Яны наведаюць іх дома, у бальніцах, дамах-інтэрнатах, прапануюць медыка-сацыяльную і гуманітарную дапамогу, псіхалагічную падтрымку.
На ўсход. Да сяброў!
Сёння актыў пярвічнай арганізацыі ГА “БРСМ” Брэсцкага дзяржаўнага тэхнічнага ўніверсітэта адправіўся ў Магілёў.
Юнакі і дзяўчаты арганізавалі акцыю “Да сяброў на ўсход краіны”. Студэнты наведаюць Магілёўскі дзяржаўны ўніверсітэт імя А.Куляшова і Беларускую дзяржаўную сельскагаспадарчую акадэмію ў Горках, а таксама шэраг памятных мясцін Магілёўшчыны. Яны сустрэнуцца з равеснікамі, якім раскажуць пра вучобу і дзейнасць грамадскай суполкі, а таксама даведаюцца пра асаблівасці тутэйшага студэнцкага жыцця.