Брастаўчанка ўдзельнічала ў “Полі цудаў”

14 мая ў папулярнай расійскай тэлепраграме «Поле цудаў» удзельнічала брастаўчанка Таццяна Быковіч. Праўда, ні на адно пытанне адказаць яна не паспела, аднак прыз – аўтамабіль «Лада» – выйграла. Як гэта ёй удалося?
…Амаль за месяц да Новага года Таццяна напісала на «Поле цудаў» пісьмо. А ў дадатак да яго ў вялікім канверце накіравала ў Маскву прыкладна два дзясяткі песень са словамі і музыкай уласнага сачынення. Была ў Быковіч такая мара, каб яе творы прагучалі на тэлебачанні. І вось у сакавіку нечакана прыйшла тэлеграма, дзе Таццяну запрашалі на здымкі тэлеперадачы і прасілі пацвердзіць свой удзел.
Збіралі шчаслівую жанчыну ўсёй грамадой. Родная 32-я школа з эстэтычным профілем, дзе Таццяна працуе настаўніцай музыкі пачатковых класаў, перадала некалькі карцін, намеснік старшыні гарвыканкама Вячаслаў Хафізаў – ляльку ручной работы і маляўнічую кнігу пра Брэст. Гранды нашай харчовай прамысловасці «Санта-Брэмар», «Інка-Фуд» дапамаглі сваёй прадукцыяй, а лікёра-гарэлачны завод нават падрыхтаваў спецыяльную бутэльку з партрэтам Леаніда Якубовіча, зашыфраваным словам і подпісам «Адгадаеш, калі вып’еш!». Дырэктар завода «Брэстсельмаш» Іосіф Паюк прасіў перадаць асабіста ў рукі вядучаму спецыяльна выраблены да юбілею прадпрыемства гадзіннік.
На здымкі «Поля цудаў» Таццяна Быковіч паехала з сынам Максімам і ўнучкай Анастасіяй. (Кожны ўдзельнік праграмы атрымлівае запрашальны білет для дваіх сваіх сяброў, родзічаў ці знаёмых, аднак пражыванне ў гасцініцы тэлекампанія «ВІД» аплачвае толькі самому ўдзельніку. Так што давялося раскашэльвацца і на дарогу да Масквы, ды яшчэ сыну і ўнучцы за жыллё плаціць).
Як аказалася, адразу здымаюць некалькі перадач на паўтара месяца наперад, таму ўдзельнікаў сабралі больш за паўсотні чалавек. Усе запоўнілі вялізныя анкеты, каб вядучаму было лягчэй з імі размаўляць у ходзе гульні.
Перад здымкамі Леанід Якубовіч правёў інструктаж: прасіў не перадаваць прывітанняў жонкам-мужам і дзецям, ад якіх гульцы толькі ўчора паехалі, іншая справа – у Амерыку ці куды далей; не агучваць назвы фірм і прадпрыемстваў – усё роўна з эфіру выражуць; не зацыклівацца на грашах і адгадванні правільных літар, а імкнуцца рабіць вясёлае шоу, бо ўсім абавязкова дадуць падарункі…
На здымках «Поля цудаў» Таццяна трапіла ў першую тройку. Крутанула барабан, сказала некалькі слоў – і выпаў сектар «Прыз»! Тут ужо ў Леаніда Якубовіча рот не закрываўся: «Кім працуеце і колькі зарабляеце?» Сказала, што 150 долараў, каб зразумела было. Якубовіч пачаў здзіўляцца: маўляў, дзе гэта ў «зялёных» зарплату выдаюць, назавіце лепш у «зайцоў». Засаромелася чамусьці Таццяна вядучаму растлумачваць, што «зайцаў» даўно няма. Вось і сказала: пяцьсот, але забыла дадаць – тысяч. Думала, што Якубовіч арыентуецца ў беларускіх рублях. Аказалася, не. Вядучы абурыўся: чаму так мала атрымлівае педагог амаль з трыццацігадовым стажам, і прапанаваў замест прыза… тысячу расійскіх рублёў. Некалькі хвілін брастаўчанка не згаджалася, лік дайшоў да сямі тысяч (а гэта семсот тысяч беларускіх), і Леанід Якубовіч так загаварыў нашу зямлячку, што яна ўжо гатова была ўзяць грошы, толькі б вядучы адчапіўся. «Няёмка было казаць, што гэта ўсяго толькі паўтары маіх зарплаты, – усміхаецца Таццяна. – Добра, сын з залы крыкнуў: «Мама, прыз!»
Якубовіч на яго пераключыўся. А потым… дастаў са скрынкі ключы ад аўтамабіля.
Пры гэтым і даўняя мара Таццяны Быковіч збылася: яе песня «Салют Перамогі» ў аўтарскім выкананні прагучала ў праграме «Поле цудаў». А гэта тэлешоу паказваюць у трыццаці краінах свету. Не пакрыўдзіў Якубовіч і трэццякласніцу Насцю, якая прачытала адзін з бабуліных вершаў. Унучцы ад «Поля цудаў» дасталіся падарункі: мабільны тэлефон «Nokia» апошняй мадэлі і тры шыкоўна выдадзеныя дзіцячыя энцыклапедыі. Увогуле, удзел дзяцей у гэтай тэлепраграме вельмі вітаецца, любіць іх дзядзька Лёня.
…На ўласнай «Ладзе» з Масквы Таццяна Быковіч не прыехала. Гэта толькі ў студыі Якубовіч гаворыць, што, маўляў, ідзіце афармляйце дакументы на аўтамабіль. На самой справе трэба будзе яшчэ тэлефанаваць у тэлекампанію «ВІД» і высвятляць, дзе і калі можна атрымаць прызавую «Ладу».
Дарэчы, усе ўдзельнікі падпісалі дакументы аб тым, што выйгрышы абкладваюцца падаткамі: у Расіі – 15 працэнтаў, а ў Беларусі – 30 працэнтаў ад кошту прыза. Так што брэсцкай настаўніцы давядзецца заплаціць кругленькую суму, перш чым атрымаць аўтамабіль. Але аб гэтым яна пакуль не думала, усё будуць вырашаць на сямейнай нарадзе. А сям’я ў Таццяны вялікая: муж, тры дачкі, сын і дзве ўнучкі.
На здымках было вельмі цікава, успамінае Быковіч, нехта з удзельнікаў гульні падарыў Якубовічу казла і гусака. Птушка нарабіла вялікага вэрхалу, і яе лавілі ўсе прысутныя ў студыі, уключаючы персанал і гледачоў. Аднак з перадачы гэты эпізод выразалі. А калі ў студыю вынеслі гару падарункаў брастаўчанкі для «Поля цудаў» – і зусім пайшла рэклама.
Асабліва крыўдна Таццяне, што з трансляцыі зніклі яе словы ўдзячнасці тым людзям, якія дапамагалі ёй збірацца ў Маскву. Выразалі расказ аб прыгожым і чыстым прыгранічным Брэсце, аб любімай 32-й школе. Кажа, здымалі праграму больш за тры гадзіны, а паказалі ў эфіры толькі адну гадзіну, ды і тую разам з рэкламнымі паўзамі.
Такая вось гульня…
Юрый МАКАРЧУК, г.Брэст.
Фота аўтара