64 тысячы дзяцей паўдзельнічаюць у малых алімпійскіх гульнях

Летняя аздараўленчая кампанія на Брэстчыне адзначана высокай спартыўнай актыўнасцю. За першую змену для больш чым 48 тысяч дзяцей адчынілі дзверы лагеры. Усюды школьнікі ахвотна ўдзельнічалі ў спартыўна-масавых мерапрыемствах. Больш за палавіну аздараўленчых устаноў актыўна ўключыліся ў праграму “Спорт для ўсіх”, якая дзейнічае ўжо два гады пад эгідай Прадстаўніцтва НАК Рэспублікі Беларусь у Брэсцкай вобласці, і правялі малыя алімпійскія гульні. Яны прысвечаны I летнім Юнацкім Алімпійскім гульням у Сінгапуры. Мэта праекта – не толькі прыцягнуць моладзь да заняткаў фізкультурай і спортам, але і абудзіць цікавасць да самых захапляючых спаборніцтваў.
Нядаўна цэнтрам алімпійскіх мерапрыемстваў стаў аздараўленчы лагер “Лясная казка”, што ў Жабінкаўскім раёне.
¬– Праект рэалізуецца ў рамках Праграмы алімпійскага выхавання, – адзначыла Алена Белаконенка, выканаўчы дырэктар Прадстаўніцтва НАК, – і наша задача – зрабіць такую практыку бесперапыннай на працягу ўсяго года. Лічу, што гэтай мэты мы дасягнулі. Тая спартыўна-адукацыйная работа, якую вядуць у школах, працягваецца ў летніках.
Пасля ўрачыстага адкрыцця гульняў амаль 320 дзяцей, якія адпачывалі ў 8 атрадах другой змены, паспрабавалі сілы ў сямі этапах спаборніцтваў. Старшакласнікі спрачаліся ў піянерболе, міні-футболе і шашках. Малодшыя – скакалі, кідалі мячы і бегалі. Юныя спартсмены праявілі сябе і ў творчасці: алімпійскай віктарыне і конкурсе на лепшы малюнак на алімпійска-сінгапурскую тэматыку.
– Наш лагер – спартыўна-аздараўленчы, – расказала Таццяна Місан, старэйшы выхавальнік, – і фізкультуры мы надаём вялікую ўвагу: уся першая палавіна дня прысвечана спорту. А малыя алімпійскія гульні і прысутнасць на іх прадстаўнікоў алімпійскага камітэта дае дзецям яшчэ большы стымул.
Летняя аздараўленчая кампанія на Брэстчыне праходзіць у чатыры змены. За гэты час амаль 64 тысячы дзяцей змогуць паўдзельнічаць у малых алімпійскіх гульнях.
Ірына АЛЬШОВА,
прэс-аташэ Прадстаўніцтва НАК
Рэспублікі Беларусь у Брэсцкай вобласці