Беларусь

Баранавіцкія юннаты праз экалогію пазнаюць патрыятызм


Баранавіцкі экалагічны цэнтр дзяцей і юнацтва – пастаянны ўдзельнік розных экалагічных праектаў, заўсёды ў авангардзе акцый па добраўпарадкаванні. Напрыклад, гэтай вясной у Дзень Зямлі ўсе гурткоўцы і выкладчыкі ЭЦДiЮ выехалі за горад, каб навесці парадак у зоне адпачынку на вадасховішчы Мышанка. Дзеці не грэбавалі прыбіраць смецце, пакінутае нядбайнымі адпачывальнікамі, зграбалі сухую траву, галлё. Каб прыбярэжная зона выглядала больш прывабнай, юннаты высадзілі дэкаратыўныя кусты і маладыя дрэўцы. Усяму гэтаму іх вучыць не трэба. Яны выдатна ведаюць, як пасадзіць любую расліну, каб яна добра прыжылася і цешыла вока. Загадзя дзеці змайстравалі каля 30 шпакоўняў і размясцiлі іх у гарадскіх парках, скверах, на тэрыторыі экалагічнага цэнтра.
Такімі карыснымі справамі Баранавіцкі экалагічны цэнтр дзяцей і юнацтва займаецца з 1949 года. Сёння гэтую пазашкольную ўстанову наведваюць больш за 1360 навучэнцаў. Для іх працуюць 115 аб’яднанняў і гурткоў па 32 эколага-біялагічных кірунках. Заняткі праходзяць не толькі на базе самога цэнтра, але і ў школах, гімназіях, дзіцячых садах, у сацыяльна-педагагічным цэнтры з дзіцячым прытулкам. Выкладчыкі займаюцца таксама з дзецьмі-інвалідамі ў тэрытарыяльным цэнтры сацыяльнага абслугоўвання насельніцтва і ў цэнтры карэкцыйна-развіваючага навучання і рэабілітацыі. Усіх жадаючых знаёмяць з пытаннямі экалогіі, вучаць рабіць сваімі рукамі вырабы з прыродных матэрыялаў. У Баранавічах ужо стала добрай традыцыяй штогод праводзіць выставу вырабаў дэкаратыўна-прыкладной творчасці дзяцей з абмежаванымі магчымасцямі па стане здароўя. Трэба адзначыць, што іх выдатныя работы выклікаюць шчырае захапленне.
Хлопчыкі і дзяўчынкі могуць вывучаць сакрэты прыроды не толькі ў тэорыі, але і на практыцы. На тэрыторыі цэнтра знаходзіцца дэндрарый, альпійскі луг, камянёвы сад у японскім стылі. Самі юннаты і экскурсанты любяць сцежку адчуванняў, дзе можна праверыць сэнсарныя магчымасці. З задавальненнем дзеці даглядаюць трусоў розных парод, хамячкоў, мышэй, шыншыл, чарапах, рыбак, птушачак, назіраюць за трохметровым пітонам. Ведаюць школьнікі шмат і аб пакаёвых раслінах, у аранжарэі цэнтра іх больш за 150 відаў. І нават у час канікулаў школьнікі ахвотна сюды прыходзяць.
Дырэктар экалагічнага цэнтра дзяцей і юнацтва Наталля Талстая кажа: “Мы не ставім мэту выгадаваць эколагаў або біёлагаў. Галоўная наша задача – выхаванне экалагічнай адукаванасці і культуры. Важна, каб нашы дзеці маглі не толькі захаваць, але і прымножыць прыгажосць прыроды, каб яны сталі сапраўднымі грамадзянамі сваёй краіны”.
Прывiваюць любоў да роднай зямлі дасведчаныя педагогі, якія заўсёды знаходзяцца ў творчым пошуку. Тое, што іх высілкi не марныя, кажуць перамогі юннатаў у гарадскіх, абласных і рэспубліканскіх конкурсах. Заслугі цэнтра ў плённай працы падзяляе яго дырэктар Наталля Талстая, уладальніца абласнога звання “Чалавек года” ў вобласці экалогіі. Яе добрасумленнасць, наватарства, адданасць справе адзначаны граматамі абласнога ўпраўлення адукацыі, гарадскога выканаўчага камітэта і гарадскога Савета дэпутатаў.
“Настаўнік павінен быць асобай, і тады дзеці будуць яго паважаць і браць з яго прыклад, – пераканана Наталля Мікалаеўна. – Педагогу трэба быць сумленным з дзецьмі, і заўсёды ён павінен вучыцца сам. Нашы педагогі асаблівыя: яны таленавітыя, любяць сваю зямлю, вучаць дзяцей паважаць і любіць сваю краіну.” Так праз экалагічнае выхаванне ў Баранавічах вядзецца выхаванне патрыятычнае.
Святлана ЛЕБЕДЗЕВА,
г.Баранавічы.
Фота аўтара

Баранавіцкія юннаты праз экалогію пазнаюць патрыятызм
Оцените статью

Добавить комментарий

Авторизация
*
*
Генерация пароля