Пераканана, што на маім месцы быў бы рады апынуцца любы мужчына ў нашай краіне, ды не толькі ў Беларусі. Шанс пазнаёміцца з уладальніцай тытула “Міс Беларусь-2012” выпадае не кожнаму. Юлія Скалковіч сёлета ўскалыхнула свет прыгажосці і ў каторы раз прымусіла ўспомніць пра вёску Клейнікі, што ў Брэсцкім раёне. Нагадаем, адсюль родам таксама Міс Беларусь-2002 Вольга Неўдах. Многія ўжо нават жартуюць, што вёска знаходзіцца ў нейкім асаблівым месцы. Можа, яно і так, дакладна сказаць не магу, а вось мая гераіня навагодняга нумара, сапраўды, чалавек неардынарны.
Пагадзіцеся, не кожны зможа прайсці выпрабаванне славай і не “падчапіць” зорную хваробу. Карона для Юліі з’яўляецца толькі аздабленнем, а не адмоўнай рысай характару, якая часам праяўляецца ў многіх прыгожых дзяўчат.
Вельмі сціплая і простая ў размове Юлія з гонарам нясе карону. Вядома ж, быць прыгожай – гэта не толькі цудоўна выглядаць: варта яшчэ мець і багаты ўнутраны свет. Дзяўчына з дзяцінства марыла стаць архітэктарам, таму з лёгкасцю паступіла ў Брэсцкі дзяржаўны тэхнічны ўніверсітэт. Аб кар’еры мадэлі вельмі дамашняя Юля нават не думала. Аднак сапраўдную прыгажосць не схаваеш! Хоць і не любіла Юлія лішняй увагі з боку навакольных ды цікаўнасці да асабістага жыцця, давялося прайсці цяжкі экзамен і з галавой акунуцца ў новы свет, у якім каралева прыгажосці заўсёды знаходзіцца ў цэнтры ўвагі.
На кастынг 20-гадовую Юлю за руку прывёў жаніх Андрэй і, пэўна ж, ведаў, што рабіў. Так-так, жаніх. Адразу разаб’ём мары і спадзяванні патэнцыяльных кавалераў. Сэрца Юліі Скалковіч занятае.
Вось так у маі адыходзячага года адной зоркай у нашай краіне стала больш. Варта адзначыць – вельмі абаяльнай зоркай. Размаўляючы з Юліяй, я таксама трапіла пад уплыў яе прыроднай прывабнасці і харызмы. Насуперак маім чаканням, калі вялі гаворку пра год адыходзячы, прыгажуня прызналася, што былі падзеі яшчэ больш яркія, чым перамога ў конкурсе прыгажосці.
– У мінулую навагоднюю ноч каханы Андрэй прапанаваў мне выйсці за яго замуж, – прызналася Юлія Скалковіч. – Калі ўзгадваць пра эмоцыі, дык менавіта гэта і быў сапраўдны цуд. Пра вяселле пакуль гаварыць рана, бо па кантракце Міс Беларусь не можа выходзіць замуж на працягу двух гадоў.
Гледзячы ў шчаслівыя Юліны вочы, разумею, што для такога кахання час – не перашкода. Сваю каралеву прыгажосці Андрэй будзе чакаць столькі, колькі спатрэбіцца.
Дзяўчына прызналася, што і ў наступным годзе чакае цудаў, а якіх – удакладняць не стала. Толькі падкрэсліла, што вельмі хоча, каб ва ўсіх усё ладзілася ды ўсе былі здаровыя і шчаслівыя.
Спадзяюся, Дзед Мароз пачуе жаданне каралевы прыгажосці і абавязкова здзейсніць яго.
Вольга СВІРЫДОВІЧ, “НТ”.
Юлія СКАЛКОВІЧ, Міс Беларусь-2012:
– Я веру ў цуды! Толькі пераканана, што яны – гэта ўсяго толькі збег пэўных абставін. Варта апынуцца ў неабходным месцы ў неабходны час. І часта гэтыя цуды залежаць ад нас саміх. Не разгубіцеся, калі вам выпадзе шанс пабыць чараўніком!