Мода на “беларускасць”?..

Як адрэагавалі берасцейцы на білборды ў падтрымку беларускай мовы

Нядаўна на вуліцах Брэста з’явіліся білборды ў падтрымку беларускай мовы. Адным з натхняльнікаў гэтай цудоўнай  і адначасова неардынарнай ініцыятывы выступіла Міністэрства культуры Беларусі. Неардынарнай такая рэклама з’яўляецца ўжо толькі таму, што на беларускай мове. Ідэя не новая: дагэтуль былі сціплыя спробы беларускамоўнага перакладу тэлевізійнай рэкламы аднаго з буйнейшых мабільных аператараў, назваў шэрагу харчовых прадуктаў, кавы, мэблі… На слых успрымаецца лёгка і мілагучна.
Відаць, настаў час і рэкламы самой беларускай мовы. Піяршчыкі, рэкламшчыкі і рознага кшталту крэатыўшчыкі ўсё часцей гавораць пра моду на так званую “беларускасць”. Выклікана такая тэндэнцыя і тым, што людзі перанасыціліся экзотыкай, немалаважную ролю адыгрывае таксама цікавасць замежжа да самабытнай беларускай культуры. Карацей кажучы, чым больш пра штосьці гаварыць і чуць – тым цікавей становіцца. Пра інтарэс людзей да ўсяго нацыянальнага вядуцца дыскусіі ў інтэрнэце, тэма знайшла водгук сярод людзей рознага ўзросту, прафесій і сацыяльнага становішча. На думку большасці карыстальнікаў сеціва, пачынаецца гэта самая “беларускасць” з роднай мовы, якую сорамна не ведаць, а тым больш не разумець.
На плакаце недалёка ад гіпермаркета “Карона” ў Брэсце прыгожая дзяўчына паведамляе аб тым, якое першае слова па-беларуску яна вывучыла: “Маё першае слова “каханне”. Якім будзе тваё першае слова на роднай мове?” Падобны білборд размешчаны на скрыжаванні бульвара Касманаўтаў і вуліцы Гогаля. Як расказалі ў адміністрацыйна-тэхнічнай інспекцыі, на сённяшні дзень у горадзе ўсталявана ўжо шэсць такіх білбордаў. Сюжэт пазітыўнай сацыяльнай рэкламы нескладаны. Хтосьці адкрыў для сябе першае слова “дзякуй” – такія білборды размешчаны на скрыжаванні вуліц 28 ліпеня і Кастрычніцкай рэвалюцыі, на вуліцы Маскоўскай; цi “сябар” – білборды на скрыжаванні Варшаўскай шашы і бульвара Шаўчэнкі, а таксама на вуліцы Гаўрылава…
Гэтая сацыяльная рэклама не засталася незаўважанай і выклікала шырокі рэзананс сярод берасцейцаў.  Што мяркуюць аб рэкламе ў падтрымку беларускай мовы людзі, мы спыталі ў іх акурат каля гэтых самых білбордаў. Гараджане актыўна выказвалі свае думкі і нават уступалі ў дыскусію паміж сабой.
Васіліна АГЯЕНЯ, хатняя гаспадыня і маладая маці:
– Шчыра кажучы, увогуле не звяртаю ўвагі на ўсялякую рэкламу, у тым ліку і сацыяльную. А тут неяк вока зачапілася за тое, што напісана не па-руску. Стала цікава. Мы з сям’ёй жывём недалёка ад “Кароны”, таму часта тут бываем і на гэты білборд ужо неаднойчы глядзелі. Толькі, ведаеце, не разумею, чаму на плакаце пытаюцца: “Якім будзе тваё першае слова на роднай мове?”. Чаму “будзе”? Не так усё дрэнна, мне здаецца, у нас з беларускай мовай. Многія людзі яе ведаюць, ужываюць, хоць і не часта.
Мікалай ШАЧНЕЎ, студэнт Брэсцкага дзяржаўнага тэхнічнага ўніверсітэта:
– Дзяўчына прыгожая, дзеці – таксама, а ў тэкст я не ўдумваюся. Калі б вы не звярнулі маю ўвагу, я б і не ведаў, што тут беларускую мову рэкламуюць. Думаю, наўрад ці людзі пачнуць адразу размаўляць па-беларуску. Сваё першае слова на роднай мове не памятаю, але было гэта даўно – пэўна ж, у першым класе. Ні бацькі, ні сябры,  ніхто не размаўляе на роднай мове. Вядома ж, хваліцца няма чым…
Кацярына КАНКОВІЧ, пенсіянерка, былая настаўніца гісторыі:
– Цудоўна, што з’явіліся такія плакаты. Яны не навязваюць нам нічога, а толькі напамінаюць, што ёсць у нас свая, родная і самая прыгожая ў свеце мова. Калі б болей менавіта беларускага было навокал (маю на ўвазе назвы, рэкламныя слоганы, аб’явы), дык, можа, не так часта мы чулі б ад людзей, што яны не разумеюць па-беларуску.
Аляксандра СНІТКО, госця з Мінска:
– Прыехала ў госці да сястры. Шчыра кажучы, для Брэста, на мой погляд, такая рэклама нетыповая. Самы заходні наш горад, усё ж такі больш “абруселы”, з адзнакай польска-ўкраінскага ўплыву. У сталіцы “беларускасць” адчуваецца больш. Аднак, калі ў Брэсце абмяркоўвалі гэтыя білборды са сваякамі і сябрамі, усе выказаліся станоўча. Нейкая добрая гэта рэклама і зусім не раздражняе. Таму поспехаў ініцыятарам і з радасцю чакаю новага крэатыву на гэту ж тэму.
Віталь ШЧУР, шасцікласнік:
– Беларуская мова мне падабаецца, таму што яна лёгкая. Вельмі падобная на рускую, толькі прасцей. Калі па рускай мове ў мяне пяцёрка, дык па беларускай –
сем балаў. Толькі размаўляю я на рускай мове, як усе. А наконт білбордаў лічу, што няхай лепей мову рэкламуюць, чым бытавую тэхніку ці каўбасу.
Аліна КАЗУЛЯ, бухгалтар у прыватнай фірме:
– Тое, што білборды з’явіліся на вуліцах Брэста, безумоўна, добра. Шкада толькі, што родную мову неабходна рэкламаваць. Мы з сяброўкамі на працы, здараецца, размаўляем па-беларуску. Спачатку проста дурэлі, а цяпер неяк прывыклі і нават слоўнікавы запас значна пашырыўся.
Запісала
Вольга СВІРЫДОВІЧ, “НТ”.
Фота Аляксея ГАНЧУКА, “НТ”.