Падтрымаем дабрачынную акцыю “Фота на памяць”

Дабрачынны праект закліканы захаваць дзецям успаміны пра светлыя імгненні іх дзяцінства
Са згуртаваннем валанцёраў “Дабро рабі” наша газета пазнаёмілася нядаўна: на электронны адрас “НТ” прыйшоў ліст са здымкам і просьбай: надрукуйце, калі ласка, бо дзеці мараць знайсці сабе бацькоў. Фота сімпатычных братоў і іх гісторыю мы аператыўна размясцілі на сайце газеты 2 мая (www.tribune.by) у рубрыцы “На першым плане”.
Атрымалі яшчэ адзін ліст, а ў ім –
прапанова стаць інфармацыйным партнёрам новага дабрачыннага праекта “Фота на памяць”. Ідэя гэтай акцыі падалася нам цікавай,  таму вырашылі расказаць пра яе ў газеце.
У нас, дарослых, амаль ва ўсіх, ёсць дзіцячыя альбомы. Адкрывае яго чалавек і можа сказаць: “Тут мне 3 гадкі, я зайчык на навагоднім свяце!” Або: “А вось я з Дзядулем Марозам!” Ці : “А тут мы з лепшым сябрам Васькай і смешным скамарохам…” І набягуць успаміны пра сваё дзяцінства. Кранальная памяць…
У выхаванцаў дзіцячых дамоў, сацыяльных прытулкаў, карэкцыйных цэнтраў мала чаго ёсць “свайго”. Любімыя цацкі губляюцца, з сябрамі і выхавальнікамі даводзіцца разлучацца. Паступова сціраецца памяць пра дзяцінства. Былі б фотаздымкі –
іншая справа! Вось валанцёры і прыдумалі акцыю, каб захаваць памяць пра дзяцінства ў здымках.
Мэта простая – зрабіць кожнаму выхаванцу інтэрната, прытулку, Дома дзіцяці фотаальбом – на ўспамін пра дзяцінства. У ім жа столькі светлых момантаў!
Добраахвотнікі могуць фатаграфаваць, рабіць здымкі, складаць з іх альбомы, запісваць дыскі з фота. Можна дапамагчы матэрыяльна, каб набыць тэхніку для фатаграфавання. Можна аказаць падтрымку альбомамі, фотапаперай, СД-дыскамі і г. д.
Падрабязней пра акцыю чытайце на сайце “Дабро рабі” (www.sirota.by) або патэлефануйце па нумары +37544-783-59-95.
Далібог, прапанова валанцёраў заслугоўвае ўвагі. Дзеці – цудоўныя фотамадэлі. Вы атрымаеце задавальненне, здымаючы іх. І прынясеце ім радасць – праз дзясяткі год, гартаючы свой фотаальбом, ці разглядаючы фотаздымкі ў рамачках або на маніторы камп’ютара, яны ўспомняць сябе ў дзяцінстве…
Зразумела, прапанову аб інфармацыйным партнёрстве мы ахвотна прынялі.
Святлана ТАБОЛІЧ, “НТ”.