Падведзены вынікі спаборніцтва журналістаў Брэстчыны за мінулы год

Восьмая па ліку цырымонія ўзнагароджання пераможцаў абласнога спаборніцтва журналістаў прайшла ў Белавежскай пушчы. Не дзіўна, бо гэты велічны запаведнік не проста вялікі лес, ён – неад’емная частка нашай гісторыі. Прыкладна 100 гадоў таму тут выдавалася першая беларуская газета “Мужыцкая праўда”. Да таго ж, пушча не аднойчы прыцягвала да сябе ўвагу прэсы, станавілася прадметам маляўнічых аповедаў і гарачых спрэчак.
Выніковае мерапрыемства традыцыйна завяршыла цыкл ушанаванняў журналістаў, які стартаваў з прафесійных свят у пачатку мая. Калі карыстацца музычнымі тэрмінамі, як заўважыў старшыня аблвыканкама Канстанцін Сумар, то гэтую падзею можна смела назваць фінальным акордам. А ён звычайна атрымліваецца самым гучным і запамінальным. Вельмі прыемна, што журналістыка Брэстчыны з кожным годам расце і развіваецца. Дасягненні нашых калег цэняцца не толькі ў межах вобласці, яны таксама гучаць на ўсю краіну. Гэта і нядаўняя “Залатая літара” – вышэйшая прафесійная ўзнагарода, прывезеная са сталіцы журналістамі раёнкі “Ляхавіцкі веснік”, і здабыткі тэлерадыёкампаніі “Брэст” на “Тэлевяршыні”, і медаль Францыска Скарыны, які за працоўныя заслугі дастаўся Валянціне Казловіч, уласнаму карэспандэнту газеты “Советская Белоруссия” па Брэсцкай вобласці… Словам, пералічваць можна бясконца.
– Журналістаў Брэстчыны, у якім бы выданні яны не працавалі, заўжды адрознівае неабыякавасць да жыцця свайго рэгіёна, – адзначыў у віншаванні кіраўнік вобласці Канстанцін Сумар. – Прадстаўнікоў гэтай прафесіі можна параўнаць хіба што з будаўнікамі, бо яны таксама пакідаюць значны след у гісторыі. І калі пісаць – дык толькі так, каб памяталі і праз стагоддзі. Вельмі добра, што апошнім часам у газетах з’явіліся пісьменнікі.
Сама цырымонія ўзнагароджання сёлета не засталася без сюрпрызаў і інтрыг. У намінацыі сярод абласных, аб’яднаных, і рэгіянальных газет, напрыклад, журы вырашыла не выяўляць пераможцаў. Затое з ліку раённых газет лаўры атрымалі аж два выданні: “Навіны Камянеччыны” і бярозаўскі “Маяк”. Перамогу ў намінацыі сярод электронных СМІ раздзялілі баранавіцкая тэлекампанія “Інтэкс” і тэлерадыёкампанія “Пінск”.
У ліку пераможцаў ёсць і журналісты “Народнай трыбуны”. Загадчыца аддзела сацыяльна-эканамічных праблем Надзея Яцура прызнана мацнейшай у намінацыі “Лепшы нарыс “Наш сучаснік”, а ўласны карэспандэнт Ніна Леанавец – у намінацыі “Ахова прыроды і навакольнага асяроддзя”. Спецыяльным дыпломам аблвыканкама за маштабны выдавецкі праект “Стваральнікі” і актыўную маркетынгавую палітыку адзначаны намеснік галоўнага рэдактара “НТ” Уладзімір Сітуха, які пад апладысменты прысутных прадэкламаваў свае вершы. Аналагічную ўзнагароду за высокі прафесіяналізм у падрыхтоўцы фотаматэрыялаў і арыгінальны творчы праект “Родам з вёскі” атрымаў і фотакарэспандэнт Аляксей Ганчук. Акрамя таго, ужо ў каторы раз у спісе лепшых юнкараў вобласці фігуруе імя Дар’і Ніканчук з Жабінкі, якая шмат публікуецца ў “Народнай трыбуне” і з’яўляецца адной з самых актыўных удзельніц “Школы юнкараў” пры рэдакцыі газеты.
Самыя годныя прадстаўнікі сродкаў масавай інфармацыі па версіі Беларускага саюза журналістаў і Саюза пісьменнікаў Беларусі таксама атрымалі дыпломы і прэміі.
Тамара Васількова, “НТ”.