Беларусь

Пенсіянераў хвалюе праблема з пасадкай бульбы


Усхваляваным голасам загаманіў рэдакцыйны тэлефон. Дакладней, на другім канцы провада гаварыла жыхарка вёскі Чарняны Марыя Кулічык. Пенсіянерка скардзілася: “У нас праблема з пасадкай бульбы. У мясцовай гаспадарцы, кажуць, больш за 7 тысяч браць будуць за сотку. Усяго па такой цане можна пасадзіць 15 сотак, а калі хочаш больш, дык плаці па поўным кошце, а гэта звыш 10 тысяч рублёў. Ці ж гэта справядліва? У іншых гаспадарках менш бяруць, можа, і бясплатна садзяць бульбу…”
Хваляванне Марыі Міхайлаўны зразумелае. Бульбу ў вёсцы садзяць заўсёды на самых большых участках зямлі. Калі людзі маладзейшыя, для іх не праблема дайсці да таго поля, апрацаваць яго, сабраць ураджай. А вось пажылым не так проста гэта зрабіць. Ды і пенсіі ў былых калгаснікаў не самыя зайздросныя па нашым часе. Падтрымаў жонку і Мікалай Канстанцінавіч, калі мы сустрэліся ў Чарнянах. Ён адпрацаваў у калгасе больш за 40 год. Сёння трымае сваю гаспадарку, здае малако. Кажа: “Мы і раней плацілі за соткі, але ж не столькі многа”.
За тлумачэннямі іду да старшыні СВК “Чарняны”. Міхаіл Перкавец расказвае: “Рашэннем праўлення гаспадаркі былі зацверджаны расцэнкі на апрацоўку ўчасткаў і пасадку бульбы. Прынамсі, наша прадпрыемства павінна выдзеліць бясплатна зямлю. Што і зроблена. Але ж мы разумеем, што не ўсе самі могуць справіцца з яе апрацоўкай, не ва ўсіх ёсць неабходная тэхніка. Падлічылі, што кошт паслуг складзе 10300 рублёў. Вызначылі і льготы: на 60 працэнтаў для тых, хто зараз працуе ў СВК “Чарняны”, на 30 – для інвалідаў 2-й групы і калгасных пенсіянераў, на 20 – некалгасным пенсіянерам. Інваліды вайны і працы 1-й групы на аднаго чалавека могуць 15 сотак пасадзіць бясплатна, а астатнія – з 30-працэнтнай льготай. Вяскоўцам, якія ў гаспадарцы не працуюць, паслуга даецца па сабекошце”.
Хацеў бы Міхаіл Міхайлавіч зрабіць большымі льготныя ўмовы, ды пакуль фінансавы стан гаспадаркі не дазваляе. У вёсцы жыве амаль 800 чалавек, а ў СВК працуюць толькі 120. “Самае галоўнае – эканоміка. Вымушаны лічыць, каб не было запазычанасці па той жа зарплаце. Хочацца і яе падняць, але не ўсе разумеюць, што для гэтага працаваць трэба рупліва не толькі на сваім уласным агародзе”, – гаворыць старшыня.
У сельсавеце сакратар Надзея Філановіч пацвердзіла, што для старэйшых грамадзян сёлета ўчасткі пад бульбу выдзелены недалёка ад вёскі – не больш чым за кіламетр. І пашу для прыватнага статка СВК “Чарняны” даў непадалёку. “Калі ўзнікаюць праблемныя пытанні, стараемся разабрацца разам”, – заўважае Надзея Яфімаўна.
Што да параўнання з іншымі гаспадаркамі і магчымасці бясплатных сотак, дык кіраўнік райсельгасхарчу Вячаслаў Федзюковіч па тэлефоне сказаў: “Ва ўсіх СВК раёна за апрацоўку ўчасткаў, пасадку бульбы, яе догляд плацяць. Іншая справа, што кожная гаспадарка, зыходзячы са сваіх фінансавых магчымасцей, дае льготы. Напрыклад, у Дарапеевічах за комплекс работ ад вывазу арганікі да пасадкі бульбы члены СВК, пенсіянеры, вясковая інтэлігенцыя заплацяць каля 5 тысяч рублёў, усе астатнія – 9690. А ў Хаціславе сабекошт – амаль 11 тысяч.”
Эканоміка – рэч прагматычная. Вось толькі гэты прагматызм не могуць прыняць вясковыя пенсіянеры, якія некалі за працадні цяжка працавалі на зямлі. Шэраг прэтэнзій узнікае з-за несвоечасовага і недакладнага інфармавання людзей. Зразумела, што ў кіраўніка гаспадаркі зараз у полі шмат клопату, але ж за прагматычнай эканомікай заўсёды стаяць людзі.
Святлана ТАБОЛІЧ, “НТ”,
Маларыцкі раён

Пенсіянераў хвалюе праблема з пасадкай бульбы
Оцените статью

Добавить комментарий

Авторизация
*
*
Генерация пароля