Беларусь

  • Главная
  • Навiны
  • Яўгенія Грынько атрымала дыплом першай ступені на рэспубліканскай алімпіядзе па англійскай мове

Яўгенія Грынько атрымала дыплом першай ступені на рэспубліканскай алімпіядзе па англійскай мове


У абласным ЦМТ адбылося ўшанаванне пераможцаў рэспубліканскіх алімпіяд па вучэбных прадметах.
Матэматыкі, фізікі, інфарматыкі, філолагі, лінгвісты… Самыя адораныя юнакі і дзяўчаты з усёй вобласці сабраліся ў сераду ў Брэсце для таго, каб падвесці вынікі сваёй цяжкай работы за год. Каля паўсотні прызёраў рэспубліканскіх алімпіяд, удзельнікаў міжнародных конкурсаў і інтэлектуальных спаборніцтваў паўдзельнічалі ў сустрэчы з кіраўніцтвам вобласці, якая традыцыйна праходзіць у канцы навучальнага года.
– Поспехі нашых школьнікаў – цудоўны падарунак настаўнікам і бацькам, асаблівае значэнне яны маюць у год святкавання 65-годдзя Вялікай Перамогі, – адзначыў у сваім выступленні старшыня аблвыканкама Канстанцін Сумар. – Іх веды і талент – інтэлектуальная моц і творчы патэнцыял нашай дзяржавы. Для развіцця здольнасцей падрастаючага пакалення ў навучальных установах створаны добрыя ўмовы. Безумоўна, лепшыя вынікі паказваюць брэсцкія школьнікі. Апошнім часам радуюць сваімі дасягненнямі вучні Лапацінскай школы Пінскага раёна і Малечскай СШ Бярозаўскага. Прыемна адзначыць, што банк даных адоранай моладзі штогод папаўняецца новымі імёнамі.
Дзесяцікласніца гімназіі №1 з Баранавіч Яўгенія Грынько атрымала дыплом першай ступені на рэспубліканскай алімпіядзе па англійскай мове. Дзяўчына ўпершыню ўдзельнічала ў інтэлектуальным тэсціраванні такога ўзроўню і адразу стала лепшай.
– Здаецца, навічкам шанцуе, таму што мой дэбют на рэспубліканскай алімпіядзе пераўзышоў самыя смелыя спадзяванні, – падзялілася ўражаннямі Яўгенія. – Хацела б у наступным годзе паўтарыць вынік і перамагчы. Будучую прафесію мяркую звязаць з эканомікай і палітыкай, а веданне англійскай мовы дапаможа ў кар’еры.
Таленавітая школьніца захапляецца спортам і музыкай, яна нават асвоіла цымбалы. Але большасць вольнага часу займае вывучэнне англійскай мовы. Дзякуючы любімай настаўніцы Зоі Аляксееўне Быковіч, заняткі праходзяць цікава.
– Калі паміж вучням і настаўнікам усталёўваюцца сяброўскія зносіны, дык і вынік ёсць, – расказвае выкладчык англійскай мовы баранавіцкай гімназіі №1 Зоя Быковіч. – Цудоўна, што нашы дасягненні не застаюцца незаўважанымі. Такая ўвага з боку ўлады – вялікі стымул узяць новую вышыню.
Вучні і настаўнікі атрымалі дыпломы і грашовыя прэміі ад аблвыканкама. Калектывы мастацкай самадзейнасці падрыхтавалі віншавальны канцэрт. Ужо развітваючыся, юнакі і дзяўчаты пажадалі адзін аднаму добрых канікул. Яны заслужылі гэты адпачынак!
Вольга СВІРЫДОВІЧ, “НТ”,
г. Брэст.
Фота аўтара

Яўгенія Грынько атрымала дыплом першай ступені на рэспубліканскай алімпіядзе па англійскай мове
Оцените статью

Добавить комментарий

Авторизация
*
*
Генерация пароля