Нарэшце, здзейснілася! Перарэзана чырвоная стужка на самым працяглым па часе будаўніцтва ў гісторыі Брэста аб’екце
На вуліцы Савецкай у абласным цэнтры адкрыты шматфункцыянальны бізнес-цэнтр “Дзідас-Персія”. Горад пазбавіўся-такі даўгабуду, які дзесяцігоддзі псаваў турыстам прыемныя ўражанні, ды і брастаўчан моцна раздражняў. Замежнае таварыства з абмежаванай адказнасцю “НТМ” падрадзілася пераўтварыць гэты куточак горада над Бугам і з задачай справілася. Дарэчы, эскіз фасада выбіралі з 22 (!) праектаў і знайшлі той, што і сучасны, і ў інтэр’ер вуліцы Савецкай упісаўся выдатна.
На ўрачыстым адкрыцці старшыня гарвыканкама Аляксандр Палышанкоў заўважыў: “За 35 год у гэтага будынка змянілася шмат гаспадароў, не раз перайначвалася і яго функцыянальнае прызначэнне. Можа, і добра, што мы яго не пабудавалі да маскоўскай Алімпіяды 1980 года – тады гэта быў бы невыразны гасцінічны комплекс часоў СССР. Цяпер жа горад атрымаў аб’ект унікальны па сваёй сутнасці, які спалучыў у сабе шматфункцыянальнасць, іранскую нацыянальную культуру і майстэрства нашых будаўнікоў”.
Падтрымаў мэра Пасол Ісламскай Рэспублікі Іран у Рэспубліцы Беларусь Махамад Рэза Сабуры: “Нягледзячы на цяжкасці, гэты праект, прафінансаваны іранскім бокам на 37 мільёнаў долараў, паспяхова рэалізаваны фірмай “Дзідас”. Я прабыў у Беларусі толькі некалькі месяцаў, але ўжо знаходжу яе чароўнай, а ваш народ – цудоўным”.
Безумоўна, непаўторнасці Брэсту надасць цяпер і бізнес-цэнтр на Савецкай. Тут размясціліся офісы з кандыцыянерамі, оптавалаконнай сістэмай сувязі, высакаскорасным інтэрнэтам, прасторныя гандлёвыя залы, утульная гасцініца, выставачная галерэя і… аглядная пляцоўка, з якой адкрываюцца захапляльныя віды Брэста. І нават на польскі бок зазірнуць можна. У афармленні інтэр’ераў пануюць белы колер і шкло, вока радуюць фрэскі і артэфакты, прывезеныя з Ірана. Персідскія матывы гэтак жа гарманічна спалучыліся з Брэстам, як і нашы беларускія цымбалы ўліліся ў гучанне іранскай музычнай групы “Авінда”, якая выступала на адкрыцці цэнтра.
У перспектыве – другая чарга аб’екта, дзе будзе створаны забаўляльны цэнтр і шматузроўневы паркінг для легкавых аўтамабіляў.
Святлана ТАБОЛІЧ, “НТ”.
Персідскі матыў на Савецкай
