Гэтае пытанне я адрасую кіраўніцтву Брэсцкага аддзялення Беларускай чыгункі, бо мне неабыякава, якой будзе экалогія ў абласным цэнтры заўтра, праз некалькі тыдняў, калі сыдзе снег, праз год.
А справа вось у чым. Мне часта даводзіцца ездзіць цягнікамі ў іншыя кірункі, і я ведаю: пакуль састаў не праедзе санітарную зону, туалеты застаюцца зачыненымі. І гэта правільна, хоць іншы раз некаму і не падабаецца. А вось дызель-цягніка Брэст – Забалацце (на работу ў абласны цэнтр на ім езджу ўжо 21 год) гэта, па ўсім відаць, не тычыцца. Бо ў ім пік наведвання туалета пасажырамі раніцай прыходзіцца акурат на ўездзе ў горад і працягваецца (не буду сцвярджаць, што да Брэст-Цэнтральнага, бо выходжу на адзін прыпынак раней) аж да станцыі Брэст-Палескі. І так штодзень.
Раз’язныя білетныя касіры, магчыма, забываюць зачыняць туалеты своечасова або не паспяваюць. На заўвагі ж неабыякавых пасажыраў, што ўжо гарадская рыса, не рэагуюць ці спасылаюцца на тое, што там людзі і яны не могуць нічога зрабіць. Дык, можа, тады і санітарную зону адмяніць, калі яны нічога не могуць зрабіць? Ці тут яе ўвогуле няма?
Надзея ЯЦУРА, “НТ”.