Старшыня Камітэта дзяржкантролю Беларусі Аляксандр Якабсон праінспектаваў шэраг прадпрыемстваў Берасцейшчыны

Пра шампіньёны, пену і дарогу
У другой палове дня, пасля пасяджэння аблвыканкама, старшыня Камітэта дзяржкантролю праінспектаваў шэраг рэзідэнтаў свабоднай эканамічнай зоны “Брэст”.  Спачатку ён пабываў на прадпрыемстве “БОНШЕ”, якое займаецца вырошчваннем шампіньёнаў, – самым буйным вытворцам гэтай прадукцыі ў рэспубліцы. Дарэчы, у суседняй Польшчы такіх фірм аж 2,5 тысячы. Менавіта адтуль у Брэст завозіцца сыравіна і нават… торф.
Па словах дырэктара прадпрыемства Андрэя Котава, у Беларусі з торфам праблем няма, аднак давесці яго да вытворчай кандыцыі, каб можна было вырошчваць грыбы, рукі не даходзяць – чамусьці прадпрымальнікі тут ініцыятыву праяўляць не спяшаюцца. Вось і даводзіцца купляць торф за мяжой, вывозячы з краіны дэфіцытную валюту.
Для таго, каб наладзіць вытворчасць грыбоў, з Польшчы на працу запрошаны інжынер. Цяпер асноўная задача “БОНШЕ” – нарасціць аб’ёмы вытворчасці. Плануецца, што брэсцкія шампіньёны на першым этапе выцесняць з рынку імпартныя, а ў перспектыве іх будуць прадаваць на экспарт. Брэсцкі грыб не толькі таннейшы, але і смачнейшы, ды і выглядае вельмі прыгожа і апетытна: у адрозненне ад шэрага польскага “брата” ён беленькі.
Затым Аляксандр Якабсон наведаў прадпрыемства “БелИНЕКО”, на якім вырабляюць імпартазамяшчальную прадукцыю – будаўнічую мантажную пену. Прадпрыемства яшчэ маладое, аднак амбіцыйна збіраецца заваёўваць не толькі ўнутраны, але і знешні рынкі.
Асаблівую ўвагу старшыня КДК звярнуў на будаўніцтва аб’язной дарогі вакол Белавежскай пушчы. Варта адзначыць, што 200-кіла-метровая магістраль ужо амаль гатова прыняць аўтатранспарт, і цяпер рабочыя, як гаворыцца, наводзяць марафет.
–  Само дарожнае пакрыццё  не выклікае ніякіх заўваг, – зазначыў Аляксандр Якабсон. – А вось пытанні па пад’ездах яшчэ не ўсе вырашаны, інфраструктуру таксама трэба развіваць. Лічу, што невырашальных праблем не бывае, таму адказныя асобы павінны паклапаціцца аб тым, каб усе недапрацоўкі былі ліквідаваны ў самы кароткі тэрмін. А Камітэту дзяржкантролю Брэстчыны даручана ажыццяўляць за гэтым кантроль.
Тэрыторыі вакол дарогі вельмі прывабныя для інвестараў, але, як запэўніў старшыня Камянецкага райвыканкама Андрэй Пісарык, вакол пушчы будуць жыць у першую чаргу беларусы. Цэны на нерухомасць тут ужо выраслі, аднак жадаючыя купіць домік у вёсцы могуць яшчэ паспець гэта зрабіць па неза-воблачных расцэнках.
На дарозе адкрыты спецыяльныя пераходы для жывёл: вялікія – для зуброў і іншых капытных, маленькія – для жаб.
Ужо ў лістападзе аб’язная дарога вакол Белавежскай пушчы будзе афіцыйна адкрыта.
Вольга СВІРЫДОВІЧ, “НТ”.