У мэтавай праграме “Духоўнасць” вось ужо тры гады актыўна ўдзельнічае Ганцавіцкая раённая дзіцячая бібліятэка

Сярод кніжных паліц гэты куточак з яркім надпісам адразу кідаецца ў вочы. Маляўніча аформлены, ён прыцягвае ўвагу і дзяцей, і дарослых. На паліцах – літаратура духоўнай тэматыкі. Тут можна ўзяць і дзіцячае выданне “Бібліі”, і гісторыі пра святых, і кнігі пра святыя мясціны Ганцаўшчыны, Брэстчыны, увогуле Беларусі.
– Наш народ моцны сваёй духоў-насцю, – упэўнена намеснік дырэктара Ганцавіцкай цэнтралізаванай раённай бібліятэчнай сістэмы па рабоце з дзецьмі Валянціна Мініч. – Надзвычай важна перадаць яе падрастаючым пакаленням. Таму, калі ў 2010 годзе раcпрацавалі бібліятэчную праграму “Духоўнасць”,  актыўным удзельнікам праекта стала раённая дзіцячая бібліятэка. Духоўна-маральнае выхаванне дзяцей, збор і вывучэнне матэрыялаў духоўнай спадчыны –  высакародныя мэты, якія ўвасобіліся ў куточак “Духоўнасць. Вера. Вечнасць”, выставы кніг, сустрэчы са святарамі, сумесныя праекты з нядзельнай школай Свята-Ціханаўскага храма. Асабліва шмат мерапрыемстваў праходзіць тут сёлета, у год 1025-годдзя Хрышчэння Русі.
Куточак духоўнасці ў дзіцячай бібліятэцы – гэта не проста выстава літаратуры адпаведнай тэматыкі. Сярод кніг позірк спыняецца на старой іконе. Абраз прынесла ў бібліятэку Ніна Сяргееўна Рылка з Малькавіч. Хату яе ў вёсцы прадалі, дзеці перавезлі бабулю да сябе ў горад. З унучкай жанчына неяк прыйшла ў бібліятэку, убачыла куточак духоўнасці, пагаварыла з бібліятэкарамі і так прасякнулася павагай да важнай асветніцкай справы, што падарыла ікону, якую забрала з вясковай хаты з сабой у горад. “Ніны Сяргееўны ўжо няма сярод нас, але мы з удзячнасцю ўспамінаем гэтага светлага чалавека, які вось такім чынам блаславіў нас на духоўную работу і падтрымаў у ёй”.
Увогуле, падтрымку ганцавіцкія бібліятэкары атрымліваюць з самых розных бакоў. Ад юных чытачоў і іх бацькоў – дзеці і дарослыя ахвотна наведваюць урокі духоўнасці. Цікавыя мерапрыемствы рыхтуе краязнаўчы клуб “Крынічка”, што працуе пры бібліятэцы. Яго кіраўнік Валянціна Марыняк ладзіць тэматычныя сустрэчы. Так, у гасцях не раз былі настаяцель Свята-Ціханаўскай царквы, благачынны цэркваў Ганцавіцкай акругі протаіерэй Пётр Піліпчук і кіраўнік нядзельнай школы пры гэтым храме Марыя Орса. Яны падарылі бібліятэцы дзіцячыя праваслаўныя кнігі. Дапамог папоўніць куточак літаратурай і касцёл. Міжканфесійная талерантнасць – гэта дзяржаўная палітыка. І вось такі падыход свецкай установы культуры да прапаганды духоўных каштоўнасцей нашага народа, да выхавання падрастаючага пакалення ў лепшых духоўна-маральных традыцыях былых пакаленняў асабіста мне падаецца ўдалым і разумным. А сёлетні ўдзел бібліятэкі, праваслаўнай царквы і каталіцкага касцёла ў раённай кніжнай выставе “Зямля Беларусі –
зямля святая” можна назваць сімвалічным: духоўная літаратура мацуе стасункі розных грамадскіх інстытутаў і становіцца той сферай, дзе магчыма ўзаемнае прыкладанне сіл.
Наўрад ці хто будзе аспрэчваць пазітыўную ролю, якую духоўнасць адыгрывае ў маральным выхаванні дзяцей. У тым, што духоўная літаратура сёння даступная хлопчыкам і дзяўчынкам, у Ганцавічах бачаць добры знак. Значыць, духоўнасць будзе жыць у вечнасці, а яе заўсёды падтрымае вера.
Святлана ТАБОЛІЧ, “НТ”,
г. Ганцавічы.