Няшчасныя выпадкі здараюцца пераважна ў месцах, не прадугледжаных для купання. У Брэсце – гэта зоны ракі Мухавец, якія не прыстасаваныя для адпачынку. Характэрныя прыклады пацвярджаюць статыстыку. У жніўні каля бульвара Шаўчэнкі патануў 41-гадовы мужчына, тое ж здарылася і каля трубапровада па вуліцы 28 ліпеня – ахвярай вады стаў 53-гадовы брастаўчанін. У Пінску пры купанні патанула медсястра гарадской бальніцы. Перад тым, як пайсці ў ваду, яна ўжывала алкаголь. Прыкладна такая ж сумная сітуацыя ў Бярозаўскім, Столінскім, Лунінецкім, Іванаўскім і іншых раёнах.
Усяго з пачатку жніўня патанулі 14 жыхароў Брэстчыны. У месцах, дзе ёсць выратавальныя станцыі і пасты, трагедый не бывае. За гэты месяц выратавальнікі дапамаглі 13 адпачывальнікам, а больш за 300 чалавек атрымалі папярэджанні за парушэнне правіл бяспекі пры купанні ці знаходжанне каля вады ў стане алкагольнага ап’янення.
Абласны савет таварыства выратавання на вадзе ў чарговы раз рэкамендуе не купацца ў забароненых месцах, асабліва калі пілі моцныя напіткі. Беражыце сваё жыццё і не забывайцеся пра блізкіх!
Па матэрыялах абласнога савета ТВВАД
падрыхтавала Ніна ЛЕАНАВЕЦ, “НТ”
З пачатку жніўня патанулі 14 жыхароў Брэстчыны
