Міжнародная спецыялізаваная выстава (дарэчы, 24-я па ліку) аб’яднала пад сваім “крылом” каля 150 вядучых вытворцаў прадуктаў харчавання з 14 краін свету. Яна прайшла з 3 па 8 чэрвеня ў Мінску і на дэманстрацыйным полі ААТ “Гастэлаўскае”. Лепшыя айчынныя прадпрыемствы, якіх сёлета налічвалася не менш за сотню, пазнаёмілі ўдзельнікаў выставы з нацыянальнымі сакрэтамі здаровага харчавання. Свае смачныя таямніцы раскрылі і берасцейскія пекары.
Экспазіцыя гандлёвай маркі з аднайменнай назвай увасобіла ў сабе галоўныя сімвалы хлебапякарнай справы, знаёмыя, бадай, кожнаму беларусу. Мініяцюрны млын сведчыў пра неверагодную працавітасць нашых аграрыяў, спелыя каласы, акуратна сабраныя ў снапок, нагадвалі пра іх залатыя рукі, а мяшкі з мукой асацыяваліся з асалодай ад выкананай справы. Побач палала імправізаваная печ, дзе падыходзіў духмяны каравай. На ўваходзе гасцей сустракала сардэчнае “Заўжды з дабром!”, якое даўно стала візітнай карткай брэнда “Берасцейскі пекар”. Не абышлося і без доўгачаканай смакаты: свежых боханаў хлеба, выпечкі, мяккіх кулічоў і калачыкаў, апетытных торцікаў і кексаў – усяго таго, што на працягу многіх гадоў выпускаецца пад знакамітай маркай і паспела ўжо заваяваць сімпатыі землякоў.
Сапраўдныя кулінарныя шэдэўры, створаныя брэсцкімі кандытарамі, цешылі вока і прыцягвалі ўвагу гасцей выставы спакуслівым водарам. А самае прыемнае – гэтай салодкай пышнасцю можна было не толькі палюбавацца, але пасмакаваць і нават набыць. Каб шматлікія наведвальнікі не сумавалі і атрымлівалі максімальную асалоду ад экспазіцыі, для іх было арганізавана грамадскае харчаванне. Гасцінныя берасцейцы частавалі не толькі хлебам уласнага прыгатавання, але і сакавітымі шашлыкамі, стравамі на грылі, смачнымі блінамі і многім іншым. Адным словам, на беднасць прапанаванага асартыменту не скардзіўся ніхто. Прыемную атмасферу дапамагла стварыць самабытная беларуская музыка ў выкананні фальклорных калектываў, бо дзе хлеб – там, як правіла, і песня.
Шаноўнымі гасцямі берасцейскага стэнда сталі Прэм’ер-міністр краіны Міхаіл Мясніковіч, старшыня Савета Рэспублікі Нацыянальнага сходу Беларусі Анатоль Рубінаў, а таксама старшыня Савета Федэрацыі Федэральнага сходу Расіі Валянціна Мацвіенка.
На падвядзенні вынікаў буйнейшага аграрнага форуму найбольш актыўныя яго экспаненты атрымалі дыпломы з рук міністра сельскай гаспадаркі Беларусі Леаніда Зайца. Сярод лепшых аказаўся і калектыў ААТ “Брэстхлебпрам”. Працавітыя берасцейскія пекары не толькі годна прадставілі свае вырабы, але і заключылі новыя кантракты, атрымалі высокую ацэнку ад арганізатараў і наведвальнікаў “Белагра-2014”.
Лепшага стымулу для далейшага самаўдасканалення нават прыдумаць цяжка, бо менавіта клопаты пра спажывальніка і сталі залогам поспеху прадпрыемства на прафесійнай ніве. ААТ “Брэстхлебпрам” з’яўляецца лідарам па выпечцы хлебабулачных і кандытарскіх вырабаў на Брэстчыне. У складзе Міністэрства сельскай гаспадаркі краіны прадпрыемства актыўна развівае ўласную структуру. Сёння яно налічвае 7 філіялаў па ўсёй вобласці – Пінскі, Баранавіцкі, Столінскі, Кобрынскі, Ганцавіцкі, Лунінецкі і Давыд-Гарадоцкі. Галаўны офіс “Брэстхлебпрама” знаходзіцца ў абласным цэнтры.
На розных этапах хлебапякарнай справы задзейнічана звыш 2200 работнікаў – менавіта столькі пар працавітых рук налічваецца ва ўсім аб’яднанні. Дзякуючы іх стараннай працы, свежанькі духмяны бохан своечасова трапляе на наш стол. А пад гандлёвай маркай “Берасцейскі пекар” сёння вырабляецца каля 1000 найменняў хлебабулачных і 670 – кандытарскіх ласункаў. Гэта печыва “Лілея”, пернікі “Фруктовая мазаіка”, кукурузныя палачкі “Забава”, заварны хлеб “Жыцейскі”, хлеб дэсертны “Чарадзейка”, пірог “Карнавал” і многія іншыя.
Прадпрыемства ўжо на працягу многіх гадоў захоўвае слынныя традыцыі хлебапячэння, якія грунтуюцца на ўнікальных беларускіх рэцэптах. А найноўшае абсталяванне і сучасныя тэхналогіі, памножаныя на вопыт і працавітасць руплівых берасцейскіх пекараў, даюць у выніку тое, без чаго немагчыма жыццё сучаснага чалавека, – Яго Вялікасць Хлеб.
Ніна ЛЕАНАВЕЦ, “НТ”.
З выставы “Белагра-2014” дэлегацыя ААТ “Брэстхлебпрам” вярнулася з дыпломам
