Золата, словы падзякі і падтрымкі заслужылі лепшыя спартсмены вобласці

Не ўсе ведаюць, што алімпійскія кольцы носяць назву “дзеці ўдачы”. 2012 год пройдзе для спартсменаў пад знакам гэтага сімвала, і ўдача спатрэбіцца нашым землякам.
На Брэстчыне ёсць традыцыя ўзнагароджваць лепшых спартсменаў вобласці, а сустрэчу з імі праводзіць старшыня аблвыканкама Канстанцін Сумар (на здымку). Сёлета арганізатары адышлі ад прывычнага фармату “тэт-а-тэт”. У зале абласнога грамадска-культурнага цэнтра прайшла ўрачыстая цырымонія, у якой прынялі ўдзел 57 спартсменаў і 37 трэнераў.
– Прэзідэнт Беларусі Аляксандр Лукашэнка неаднойчы падкрэсліваў, што фізкультура і спорт не павінны быць справай выбраных, – нагадаў старшыня аблвыканкама Канстанцін Сумар. – Зрабіць спорт масавым заняткам –
такая мэта стаіць перад дзяржавай. Усе высокія дасягненні нашых спартсменаў з’яўляюцца не толькі прадметам гонару, але і часткай іміджу краіны і рэгіёна на міжнародным узроўні.
Перш за ўсё, Канстанцін Андрэевіч падзякаваў спартсменам за поспехі. У мінулым годзе яны паказалі лепшы за апошнюю пяцігодку вынік: былі заваяваны 79 медалёў, чвэрць з якіх – вышэйшага гатунку.
Для таго, каб нашы землякі пакарылі “золата”, старшыня аблвыканкама ўручыў залатыя ўзнагароды лепшым. Спартсменамі года прызнаны  Алег Юрэня (веславанне на байдарках і каноэ) і Любоў Чаркашына (мастацкая гімнастыка). Уручаючы зліткі каштоўнага металу алімпійцам, Канстанцін Андрэевіч пажадаў, каб у Лондане землякі таксама не падвялі.
Лепшым трэнерам прызнаны Уладзімір Задолін, які трэніруе перспектыўнага Алега Юрэню. У намінацыі “Лепшая каманда” пераможцам стаў валейбольны клуб “Атлант” з Баранавіч.
– Ад імя ўсіх спартсменаў хацелася б выказаць словы падзякі за тое, што для нас створаны добрыя ўмовы для падрыхтоўкі, – падзялілася ўражаннямі Любоў Чаркашына. – А ўсім спартсменам асабліва спатрэбіцца фартуна, менавіта яе ўсмешкі і жадаю калегам.
Сярод узнагароджаных былі славутыя спартсмены Юлія Бічык і Наталля Гелах, Віктар Братчэня і Яраслава Паўловіч. Атрымаць залатую ўзнагароду прыехалі спартсмены з Баранавіч, Бярозы, Кобрына, Лунінца, Століна. На мерапрыемства былі запрошаны таксама і будучыя зоркі вялікага спорту, для якіх гэта стала цудоўнай магчымасцю пазнаёміцца з кумірамі.
Адказваючы на пытанні журналістаў, Канстанцін Сумар расказаў, што і сам падтрымлівае добрую фізічную форму праз заняткі фізкультурай і спортам. Старшыня аблвыканкама аддае перавагу хуткай хадзьбе, плаванню і ролікам. Узгадаўшы прыклад Кіраўніка дзяржавы,  кожнаму можна параіць: пачніце з сябе. І, хто ведае, можа, здаровы дух у вашым здаровым целе дапаможа дасягнуць такіх жа высокіх вынікаў, як у алімпійцаў,  у іншых сферах народнай гаспадаркі Брэстчыны…
Вольга СВІРЫДОВІЧ, “НТ”.