Нефізічная формула ліцэіста Шараева

Добрых вучняў у нашай вобласці шмат. А вось уключаных у Міжнародны Алфёраўскі фонд падтрымкі адукацыі і навукі – усяго адзін. І гэта Уладзімір Шараеў, які вучыцца ў ліцэі № 1 імя А.С. Пушкіна г. Брэста.
Ужо з парога стала зразумела: пра ўнікальны талент юнака ведаюць усе  навучэнцы ліцэя. Чатыры дзяўчыны, якія стаялі каля ўвахода, прывітаўшыся і пачуўшы прозвішча Вовы, з ходу пачалі расказваць, які ён добры, разумны і спагадлівы. Пазней пра адказнага, мэтанакіраванага вучня ахвотна гаварыла і яго настаўніца Тамара Скавародка. Цікава было паслухаць і самога прызнанага фізіка брэсцкага ліцэя.
– Валодзя, скажы, калі ласка, як даўно ты стаў захапляцца фізікай і чаму абраў гэты прадмет?
– Яшчэ да паступлення ў ліцэй мне падабаліся дакладныя навукі: фізіка, матэматыка. Гуманітарныя прадметы мяне ніколі не цікавілі. Свой уклад у маё захапленне ўнесла і мама. Яна – настаўніца фізікі. Калі паступаў у ліцэй, загадзя ведаў, што пайду ў фізіка-матэматычны клас, бо хацеў глыбей і больш інтэнсіўна займацца гэтымі прадметамі.
– Як ты трапіў у Міжнародны Алфёраўскі фонд падтрымкі адукацыі і навукі?
– Стаў летась прызёрам рэспубліканскай алімпіяды па фізіцы, а для гэтага трэба было шмат працаваць.
– Добры вучань. Які ён?
– Сукупнасць стараннасці, працавітасці, узаемаадносін з настаўнікамі і аднакласнікамі. Вучыцца трэба так, каб не было сорамна перад самім сабой.
– Што табе больш падабаецца: вывучэнне тэорыі альбо прымяненне ведаў на практыцы?
– Спалучэнне гэтых двух аспектаў. Без тэорыі немагчыма добра выканаць практычныя заданні. Працягваю вучыцца. Зноў паспяхова выступаў на алімпіядзе па фізіцы. Удзельнічаў у навуковых школьных канферэнцыях з работамі “Даследаванні радыяцыйнага фону ў жылых памяшканнях” і “Вымярэнне вышыні будынка рознымі спосабамі”.
– Як ты лічыш, аднакласнікі не зайздросцяць табе?
– Я не адрозніваюся ад іх, толькі пэўныя дысцыпліны ў мяне засвойваюцца лепш, чым у іншых. У мяне выдатны клас, у якім шмат адораных дзяцей, таленавітых. Маю сяброў не толькі сярод аднакласнікаў, але і вучняў іншых класаў.
– Чым ты займаешся ў вольны час?
– Захапляюся спортам, ужо 10 гадоў займаюся каратэ. Тры разы ездзіў на рэспубліканскія спаборніцтвы па гэтым відзе спорту. Усе тры разы былі паспяховымі. Лічу, маё захапленне дапамагае ў засваенні фізікі, бо калі займаешся некалькімі рэчамі, выпрацоўваецца сіла волі, стараннасць…
– Валодзя, ці ёсць у цябе формула поспеху?
– Мая формула – веды плюс удача, а перамога на алімпіядзе або канферэнцыі – гэта вялікая праца.
Гутарыла Ганна ІВАШЧАНКА,
студэнтка БрДУ
імя А.С. Пушкіна.