Гатуем разам катлеты “Дзіўны вулкан”

КАТЛЕТЫ “ДЗІЎНЫ ВУЛКАН” ад Вольгі АРЭХВА, начальніка Ляхавіцкага раённага вузла паштовай сувязі:
– На кухні я для сябе – самы патрабавальны і строгі суддзя. Пераканана: калі гаспадыні падабаецца прыгатаваная страва, дык і іншым яна прыйдзецца даспадобы. Таму прапаную правераны асабістым густам рэцэпт катлет “Дзіўны вулкан”.
Трэба ўзяць: мясны фарш – 1 кг, грыбы (шампіньёны ці якія іншыя) – 300 г, сыр – 300 г, маянэз – 200 г, 2-3 цыбуліны, соль, спецыі для мяса, алей.
Запраўляем фарш спецыямі, солім і фармуем круглыя мясныя катлеты. Робім у кожнай паглыбленне, нібы кратар вулкана, і выкладваем на бляху. Здрабняем грыбы і цыбулю, абсмажваем іх на патэльні з алеем. Гэтую масу выкладваем у “кратары” катлет. Змазваем зверху маянэзам і пасыпаем сырам, надзёртым на буйной тарцы. Адпраўляем бляху ў духоўку на 30 хвілін.
Пакуль “Дзіўны вулкан” запякаецца, можна прыгатаваць салату “Аб’ядзенне”.  Першы слой – парэзанае кубікамі філе селядцоў. Другі – свежая зялёная цыбуля, якую рэжам невялікімі кавалачкамі. Трэці слой – 2 памідоры, таксама здробненыя кубікамі. Зверху – маянэз сярэдняй каларыйнасці.
Салата “разбудзіць” апетыт, а катлеты “Дзіўны вулкан” з вашым любімым гарнірам ці проста з зяленівам дапамогуць не проста перамагчы голад, а атрымаць асалоду ад ежы.