Беларусь

1 снежня – Сусветны дзень барацьбы са СНІДам


У абласным цэнтры гігіены, эпідэміялогіі і грамадскага здароўя прайшла прэс-канферэнцыя з нагоды Сусветнага дня барацьбы са СНІДам. Пра сітуацыю з ВІЧ/СНІД на Брэстчыне расказалі кампетэнтныя спецыялісты
Віталь ЗЫРКО,
намеснік начальніка ўпраўлення
па наркакантролі і процідзеянні
гандлю людзьмі крымінальнай міліцыі УУС аблвыканкама:
– У першую чаргу наша структура працуе на выяўленне і спыненне абароту наркотыкаў. Дарэчы, вядома, што большасць выпадкаў заражэння ВІЧ-інфекцыяй адбываецца пры ўнутрывенным ўвядзенні наркатычных сродкаў. Найбольш праблемнымі рэгіёнамі з’яўляюцца Брэст і Пінск. Назіраецца тэндэнцыя да павелічэння колькасці  выкрытых выпадкаў збыту наркотыкаў. Неабходна праводзіць больш актыўную прафілактычную работу ў навучальных установах і сярод працоўнай моладзі, бо менавіта яны часцей трапляюць у групу рызыкі.
Леанід ГЛЕБКА,
загадчык аддзела прафілактыкі
ВІЧ/СНІД ДУ “Брэсцкі абласны цэнтр гігіены, эпідэміялогіі
і грамадскага здароўя”:
– Брэстчына знаходзіцца на 5-м месцы ў рэспубліцы па колькасці хворых на ВІЧ/СНІД. На 1 лістапада ў вобласці зарэгістравана 1200 выпадкаў ВІЧ-інфекцыі. Асноўны шлях перадачы за ўсе гады назірання – парэнтэральны (пры ўнутрывенным увядзенні наркотыкаў), аднак у апошні час павялічылася колькасць асоб, інфіцыраваных палавым шляхам. Большасць ВІЧ-інфіцыраваных – маладыя людзі ва ўзросце 15-29 гадоў. У 11-ці школах ужо створаны кабінеты па прафілактыцы віруса, а таксама праводзіцца работа сярод працоўнай моладзі.
Аляксандр БІЛЬДЭЙКА,
галоўны ўрач абласнога наркалагічнага дыспансера:
– На жаль, урачы могуць толькі дапамагчы медыкаментозна, а вось падштурхнуць чалавека да таго, каб ён захацеў пазбавіцца ад нарказалежнасці – гэта ўжо сацыяльная функцыя. Супакою, што крытычнай сітуацыі ў нашай вобласці няма. У рамках праграмы Глабальнага фонду барацьбы са СНІДам, туберкулёзам і малярыяй у горадзе над Бугам хутка з’явіцца метадонавы кабінет.
Алена СЕЛІВОНЧЫК,
загадчык абсервацыйнага
аддзялення абласнога
радзільнага дома:
– Штогод павялічваецца колькасць жанчын з ВІЧ-інфекцыяй. Сёлета на Брэстчыне ад ВІЧ-інфіцыраваных жанчын нарадзіліся 22 дзіцяці. Прыкладна палова дзяцей нараджаецца здаровымі. Такі высокі працэнт тлумачыцца тым, што жанчыны своечасова і рэгулярна атрымліваюць камбінаваную антырэтравірусную тэрапію. На 1 лістапада дыягназ “ВІЧ-інфекцыя” пастаўлены 12 дзецям, з уліку зняты 79 здаровенькіх дзетак.
Людміла КАСЦЮКЕВІЧ,
урач-інфекцыяніст абласнога
кансультацыйна-дыспансернага кабінета па аказанні медыцынскай дапамогі ВІЧ-інфіцыраваным
і хворым на СНІД:
– Большасць з нашых пацыентаў нават і ўявіць не маглі, што бяда напаткае менавіта іх. На жаль, многія ігнаруюць лячэнне лекамі, якія, дарэчы, бясплатныя для іх, а дзяржава выдаткуе каля 200 долараў ЗША ў год на аднаго хворага. Некаторыя разумеюць усю важнасць тэрапіі ўжо ў крытычны момант. Лячэнне антырэтравіруснымі прэпаратамі атрымліваюць 335 чалавек, у тым ліку 7 дзяцей.
Ларыса ВАРАНКО,
старшыня абласной арганізацыі
Беларускага Таварыства Чырвонага Крыжа:
– Штогод напярэдадні Сусветнага дня барацьбы са СНІДам праводзяцца мерапрыемствы па прафілактыцы і процідзеянні эпідэміі ВІЧ-інфекцыі: тэматычныя конкурсы малюнкаў і плакатаў, “круглыя сталы”, віктарыны, спартыўныя спаборніцтвы, пазакласныя ўрокі ў школах, дыспуты. Асноўная іх мэта – звярнуць увагу людзей на праблему. Толькі разам мы зможам выканаць заклік “Дасягнуць нуля”  спецыяльнай кампаніі Арганізацыі Аб’яднаных Нацый.
Запісала
Вольга СВІРЫДОВІЧ, “НТ”.

1 снежня – Сусветны дзень барацьбы са СНІДам
Оцените статью

Добавить комментарий

Авторизация
*
*
Генерация пароля