Сярод іншагародніх навучэнцаў Брэсцкага дзяржаўнага каледжа сувязі 44 маладыя чалавекі галасуюць упершыню.
На гэтым тыдні навучэнцы каледжа сувязі пасля заняткаў спяшаліся не дамоў, не ў кафэ і кіно, а на выбарчы ўчастак. Яны ўпершыню прымаюць удзел у важнай дзяржаўнай справе, таму да выбараў у мясцовыя Саветы дэпутатаў адносяцца вельмі сур’ёзна. Некаторыя з іх хвалююцца і губляюцца перад кабінкамі для галасавання, але побач знаходзяцца знаёмыя людзі – выкладчыкі і выхавальнікі. Кожны “навічок” атрымлівае сувенір, каб запомніць гэты дзень назаўжды.
На базе навучальнай установы знаходзяцца два выбарчыя ўчасткі – №№50, 51, на якіх увесь час даволі шматлюдна. Большасць навучэнцаў галасуе датэрмінова, таму што ў нядзелю многія не змогуць прыйсці на свой участак – хто дамоў паедзе, а ў кагосьці знойдуцца іншыя ўважлівыя прычыны…
Сярод тых, хто ўпершыню прымае ўдзел у галасаванні, – Ірына Шапяцюк і Юлія Шаўчук. Дзяўчаты вельмі ўпэўнена адчуваць сябе падчас рэгістрацыі і ахвотна дзеляцца ўражаннямі з аднагрупніцамі. Па словах навучэнак, пакуль што нязвыкла адчуваюць яны сябе ў якасці выбаршчыкаў, але прызналіся, што прыемна несці адказнасць за свой выбар. Галіна Рамановіч расказала, што ўсе яе сваякі заўсёды ходзяць на выбары, таму і яна лічыць галасаванне сваім пачэсным абавязкам.
– Я ганаруся тым, што маю дачыненне да дзяржаўнай справы, – падзяліўся ўражаннямі Андрэй Бойка. – Хочацца, каб мае равеснікі прыходзілі галасаваць з поўным асэнсаваннем важнасці сваіх дзеянняў. Кожны голас мае ўплыў на нашу агульную будучыню, таму з выбарам трэба вызначыцца загадзя.
Юнакі і дзяўчаты заўважылі, што працэс галасавання – справа не марудная і не займае шмат часу, таму, на іх погляд, незразумела, чаму некаторыя з дарослых ігнаруюць выбары. Здаецца, яны павінны браць прыклад з падрастаючага пакалення, якое турбуецца пра сваю будучыню.
Вольга СВІРЫДОВІЧ, “НТ”
Фота аўтара