Дзе знаходзіцца вытворчасць любімых гараджанамі малака, масла, марожанага і іншых малочных прадуктаў, у Баранавічах ведаюць добра. Падлеткі, умінаючы за абедзве шчакі сыркі глазураваныя і марожанае, ахвотна паказалі дарогу. На вуліцы 50 год БССР знаходзіцца адно з найбольш мадэрнізаваных і сучасных прадпрыемстваў не толькі райцэнтра, але і краіны. Завод з’яўляецца адным з буйнейшых у малочнай прамысловасці Брэстчыны. На ім выпускаюць больш за 90 відаў прадукцыі разнастайнага асартыменту: натуральнамалочную прадукцыю, у тым ліку стэрылізаванае малако; плаўленыя, каўбасныя, паўцвёрдыя сыры; масла жывёльнае; марожанае; маянэзы; соусы; сухія, малочныя і згушчаныя прадукты; заменнікі малака і казеін кіслотны.
– Малочная вытворчасць – справа цяжкая і вельмі адказная, – разважае дырэктар ААТ “Баранавіцкі малочны камбінат” Віктар Ракуць. – Кароткія тэрміны рэалізацыі прадукцыі, вялікая канкурэнцыя, жорсткія патрабаванні пакупнікоў вымушаюць заўсёды клапаціцца пра тое, каб абсталяванне было самае новае, тэхналогіі – самыя сучасныя, а людзі імкнуліся да дасканаласці. Менавіта для таго, каб заставацца на піку поспеху, варта сказаць “так” усяму новаму і зрабіць стаўку на апярэджанне. Вучоба ў мараходным вучылішчы ў маладосці вельмі дапамагае цяпер у пакарэнні новых гарызонтаў. Вытрымка, цярплівасць і энергічнасць падштурхоўваюць не стаяць на месцы, а заўсёды плыць, нават супраць цячэння. Раней мяне неаднойчы адгаворвалі не рызыкаваць з вытворчасцю паўцвёрдых сыроў, маўляў, гэта вельмі спецыфічны і капрызны прадукт. Але жаданне прасунуцца далей на малочным рынку прымусіла не адмовіцца ад пастаўленай мэты. За свой завод хварэю душою, заўсёды імкнуся адсочваць новыя тэндэнцыі і своечасова прымяняць іх на вытворчасці.
Яшчэ ў 1992 годзе здадзены ў эксплуатацыю цэх сухіх малочных прадуктаў. Цяпер ён асна-шчаны новым прагрэсіўным тэхналагічным абсталяваннем, на якім выкарыстоўваюцца новыя тэхналогіі вытворчасці. Камбінат цалкам выкарыс-тоўвае адгон і сыроватку для перапрацоўкі. У 2008 годзе ўстанавілі сучасную лінію Tetrа Pak па вытворчасці стэрылізаванага малака ва ўпакоўцы Тэтра Фіна Асэптык.
– На камбінаце ўвесь час вядзецца мадэрнізацыя вытворчасці, разам з тым не застаецца без увагі камфорт работнікаў, – расказала галоўны тэхнолаг Ларыса Амбражэйчык. – Для персаналу створаны ўтульныя бытавыя пакоі і памяшканні для адпачынку. Атмасфера, якая пануе на прадпрыемстве, стымулюе да добрай працы. Пастаянны лабараторны тэхналагічны кантроль на ўсіх стадыях вытворчасці забяспечвае высокую якасць прадукцыі. На прадпрыемстве актыўна вя-дзецца работа па павелічэнні тэрмінаў рэалізацыі за кошт узмацнення жорсткасці патрабаванняў да вытворчага працэсу і ўпаковачных матэрыялаў. Калектыў працуе над удасканаленнем тэхналогій і распрацоўкай новых відаў прадукцыі. Шмат увагі ўдзяляецца выпуску дыетычных, лячэбна-прафілактычных прадуктаў з разнастайнымі карыснымі дабаўкамі, якія аказваюць аздараўленчы эфект на арганізм чалавека.
Магчыма, таму так падабаюцца дзецям і дарослым смятана, тваражок, кефір, напіткі, зробленыя добрымі людзьмі і кваліфікаванымі спецыялістамі. І, што немалаважна, з натуральных прадуктаў. Гандлёвая марка “Раніца” – брэнд, які гарантуе цудоўны смак і высокую якасць. На ААТ “Баранавіцкі малочны камбінат” клапоцяцца пра тое, каб задаволіць густ пакупнікоў добра вядомым асартыментам і парадаваць навінкамі. Для гэтага тут штодзённа працуюць паўтысячы чалавек.
Бяспеку і якасць прадукцыі гарантуе сістэма бяспекі харчовых прадуктаў. Пяць гадоў таму прадпрыемству быў уручаны сертыфікат сістэмы СТБ ІСО 9001-2001. Крыху пазней камбінат атрымаў экспартны ветэрынарны нумар. На прадпрыемстве дзейнічаюць сістэма менеджменту навакольнага асяроддзя ў адпаведнасці з патрабаваннямі ISO 14001:2004, а таксама сістэма кіравання аховай працы ў адпаведнасці з міжнародным стандартам OHSAS 18001. Вядзецца распрацоўка сістэмы менеджменту бяспекі харчовых прадуктаў СТБ ІСО 22000-2006. Два гады таму ААТ “Баранавіцкі малочны камбінат” атрымаў права маркіраваць сухое малако і масла сметанковае знакам “Натуральны прадукт”.
Вялікія надзеі ўскладаюць работнікі на новы сыраробны цэх. Ён пачаў працаваць у студзені гэтага года. Уражвае сучаснае аўстрыйскае абсталяванне. У працэсе вытворчасці амаль не задзейнічаны людзі. Аўтаматызацыя дазваляе не толькі эканоміць рэсурсы, але і павысіць узровень якасці сыроў. На кожным аддзяленні задзейнічана па адным чалавеку, найбольш запатрабавана ручная праца на ўпакаванні. І тут баранавіцкі камбінат стаў наватарам. На прадпрыемстве адмовіліся ад такой працэдуры, як абсушка сыроў, гэта дазваляе скараціць затраты, аблегчыць працу людзей і не згубіць смакавыя якасці сыру. Пакуль тут наладжана вытворчасць вядомых усім “Расійскага”, “Расійскага маладога”, “Галандскага” сыроў. У бліжэйшай будучыні плануецца пачаць вырабляць яшчэ і “Пашахонскі”. На заводзе прадумана кожная аперацыя вытворчасці, нават ёсць машына для мойкі кантэйнераў.
Сярод прадпрыемстваў па вырабе сыроў баранавіцкае адрозніваецца навізной абсталявання – такая палітыка кіраўніцтва. Сярод найноўшых тэхналогій можна назваць устаноўку мікрафільтрацыі расолу ў цэху па вытворчасці сыру, якая дазваляе максімальна ачысціць расол. Сучасныя тэхналогіі выкарыстоўваюцца не толькі ў вытворчасці, але і ў захоўванні гатовай прадукцыі. Нядаўна пачало функцыянаваць новае сховішча для сыру з некалькімі камерамі захоўвання. Вядома ж, добры сыр павінен выспець, а для гэтага на камбінаце створаны выдатныя ўмовы.
– Новы цэх адкрывае шырокія магчымасці для камбіната, – пераканана начальнік цэха Святлана Дзявяткіна. – Сыры становяцца ўсё больш запатрабаванымі сярод насельніцтва. У спажыўцоў ёсць вялікі выбар гэтай прадукцыі, таму мы імкнёмся заняць сваю нішу на гэтым рынку пры дапамозе натуральнай сыравіны, асаблівай рэцэптуры і ўкладзенай у працу душы.
Пра тое, што прадукцыя вельмі запатрабавана, сведчыць той факт, што завод адгружае гатовыя тавары на чыгунку і на аўтапаязды, для гэтага абсталяваны спецыяльныя пад’езды. Еўрапейскі рамонт і беларуская працавітасць рухаюць прадпрыемства далёка наперад. Малочны камбінат, быццам флагман у малочным моры, апярэджвае час і ведае, як захаваць лідарскія пазіцыі ў няпростай для вытворцаў малочнай сферы.
Прадукцыя завода доб-ра вядомая ў розных рэгіёнах Беларусі. Сухія малочныя прадукты, казеін тэхнічны, масла жывёльнае шырока рэалізуюцца ў Расійскай Федэрацыі, Польшчы, Германіі, Азербайджане, Казахстане. Пастаўкі таксама ажыццяўляюцца ў Егіпет і Сірыю.
За шматгадовы вопыт работы прадпрыемству ўдалося ў некалькі разоў павялічыць вытворчую магутнасць. Акрамя папулярнасці і даверу сярод пакупнікоў, прадукцыя малочнага камбіната атрымала прызнанне і прэстыжныя ўзнагароды на шматлікіх конкурсах. Па выніках спаборніцтва “Лепшыя тавары Рэспублікі Беларусь” кефір фруктовы стаў лаўрэатам, такую ж высокую адзнаку атрымала масла “Крестьянское”. Яно ж атрымала званне лаўрэата ў конкурсе “Лепшыя тавары Рэспублікі Беларусь на рынку Расійскай Федэрацыі”. Пераможцамі прызнаны таксама такія прадукты, як абястлушчанае малако, ёгурт малочны “Неженка”. Дыплом пераможцы конкурсу “Густ-2007” у намінацыі “Марожанае” мае “Пламбір класічны” ў вафельным стаканчыку. Сярод усіх узнагарод завода асаблівае месца займае “Прэмія аблвыканкама ў галіне якасці”.
Купляючы прадукцыю ААТ “Баранавіцкі малочны камбінат”, пакупнікі аддаюць перавагу карысным, смачным і бяспечным таварам. Калектыў завода працуе пад дэвізам: “Якасць – ключ да канкурэнтаздольнасці і росквіту прадпрыемства”. Гучны слоган апраўданы на сто працэнтаў, а таму прадукцыя на магазінных прылаўках не затрымліваецца, яе раскупляюць.
Вольга СВІРЫДОВІЧ, “НТ”
ААТ “Баранавіцкі малочны камбінат” выпускае прадукцыю для ўсіх, хто любіць натуральнае
