Ад Ірыны МАКАРЭВІЧ, дырэктара Бярозаўскай цэнтралізаванай бібліятэчнай сістэмы:
– Прынцып, якім кіруюся, зусім просты: сям’я павінна быць накормлена і накормлена смачна. Асабіста я аддаю перавагу мамінай кухні – дранікі, галубцы, супы. Беларускія стравы вельмі смачныя, а таму на стале яны заўсёды актуальныя. Безумоўна, пад настрой ці якое свята з гасцямі можна сябе і экзатычным чым-небудзь парадаваць. Але часам самая звычайная страва і па смаку, і па выглядзе не саступае той экзотыцы. Хоць бы ўзяць рулет “Царскі”. Рэцэпт прачытала ў адным беларускім часопісе, паспрабавала і, хоць я не вялікі аматар рыбных страў, вынікам засталася задаволена.
Для прыгатавання аднаго рулета бяром: свежамарожаную скумбрыю, моркву, яйцо – усё па 1 шт., 20-25 г сухога жэлаціну, невялічкі кавалачак сала, соль, цукар, перац.
Моркву і яйцо варым. Рыбіну разбіраем на два аднолькавыя кавалкі філе, солім, перчым па смаку і дадаём трошкі цукру. На буйной тарцы дзяром моркву, яйцо наразаем кольцамі, а сала – тонкімі скрылікамі. На адну палавінку філе высыпаем роўным слоем жалацін, потым выкладаем сала, на яго – моркву, затым кладзём яйцо. Накрываем другім кавалкам філе, загортваем у харчовую плёнку, перавязваем і праколваем плёнку ў некалькіх месцах. Апускаем рулет у падсоленую ваду, якая кіпіць, і варым 30-40 мінут. Дастаём і адпраўляем пад прэс.
Здымаем плёнку і наразаем рулет. Выкладаем яго на блюда, якое можна ўпрыгожыць зяленівам. Выглядае так апетытна, што ў смаку стравы ніхто не будзе сумнявацца.
Рулет “Царскі”
