Утульная светлая зала гродзенцаў прыняла пад свае “крылы” запамінальныя маляўнічыя карціны мастакоў Аксаны Гайдуковіч, Ігара Скавародкі, Анатоля Хвісевіча, Міхаіла Канькова, Леаніда Рацько, Валерыя Кавальчука; малыя графічныя творы Льва Алімава, Аляксандра Грыгор’ева і Аляксандра Улыбіна; эмалі заслужанага дзеяча мастацтваў Беларусі Мікалая Кузьміча, скульптуры Алесі Гуршчанковай і Паўла Герасіменкі, арыгінальныя творы маладых жывапісцаў Алеся Фалея і Янкі Рамановіча…
56 работ 15-ці берасцейскіх мастакоў стварылі адзіную гарманічную кампазіцыю, з якой зацікаўлена знаёміліся гродзенскія аматары выяўленчага мастацтва.
У сваім выступленні на адкрыцці выставы галоўны спецыяліст упраўлення мастацтваў Міністэрства культуры Беларусі Аляксандр Зіменка назваў выставы берасцейцаў у Гродне і гродзенцаў у Брэсце добрым знакам для далейшага творчага супрацоўніцтва, развіцця выяўленчага мастацтва, а акцыю “Зямля пад белымі крыламі” – важнай падзеяй у культурным жыцці ўсёй Беларусі.
Прыняў удзел у адкрыцці выставы і мэр горада Гродна Барыс Казялкоў, які ў свой час вучыўся ў Брэсцкім інжынерна-будаўнічым інстытуце. Яму было асабліва прыемна вітаць берасцейскіх мастакоў, ён паабяцаў у далейшым усялякую дапамогу ў творчым і культурным супрацоўніцтве Брэста і Гродна.
Намеснік начальніка ўпраўлення культуры Брэсцкага аблвыканкама Тамара Паўлюковіч павіншавала гродзенскіх мастакоў, прадстаўнікоў мясцовай улады і культуры Гродна і ўручыла памятныя сувеніры.
Першая такая выстава берасцейскіх мастакоў на гродзенскай зямлі стала вынікам добрасуседскіх адносін і трамплінам для далейшага творчага супрацоўніцтва.
Леанід ВАЛАСЮК,
член ГА “Беларускі саюз мастакоў”
от8 февраля, 2019