Бярозаўскія школьнікі аддаюць перавагу літаратурным творам землякоў

Цікавіць падлеткаў мінулагодні адзінаццаты нумар часопіса “Маладосць”, які цалкам прысвечаны выдатным людзям Берасцейскага краю. Гэтае выданне можна пабачыць на вучнёўскім стале старшакласнікаў у час урокаў, скажам, матэматыкі ці хіміі ў СШ №1 г.Бярозы. А яшчэ тут з задавальненнем чытаюць аповесць земляка з Івацэвіч Валерыя Гапеева “Доказ закона прыгажосці”. Большасць юнакоў і дзяўчат “смакуе” ўжо і інтэрнэтны экзэмпляр гэтага твора. А настаўнікі дакладных навук даравалі калегам-філолагам за інфармацыйнае “маўчанне” толькі пасля таго, як увага дарослай аўдыторыі была скіравана на чарговы твор Валерыя Гапеева – апавяданне “Развітальная вячэра. Сямейная драма”, якое было надрукавана ў дзясятым нумары часопіса “Полымя” за 2009 год.
Даволі хутка настаўнікамі і вучнямі было прынята рашэнне запрасіць таленавітага пісьменніка-земляка да сябе ў госці для таго, каб пазнаёміцца з яго асобай, творчасцю і па мажлівасці абмеркаваць змест апошняй аповесці для старшакласнікаў “Доказ закона прыгажосці”. Падобныя сустрэчы з майстрамі пяра, беларускай філалогіі і літаратуразнаўства ўжо даўно сталі традыцыйнымі ў бярозаўскай школе №1. Тут у свой час пабывалі ў гасцях Уладзімір Арлоў, Генадзь Бураўкін, Сяргей Законнікаў, Анатоль Зэкаў, Васіль Жуковіч, Міхась Скобла, Алесь Камоцкі. Некалькі разоў гасцявала і выпускніца гэтай навучальнай установы, славутая паэтэса Ніна Мацяш.
Валерый Мікалаевіч Гапееў, як высветлілася, лёгкі на пад’ём. Зараз ён з’яўляецца адказным сакратаром газеты “Івацэвіцкі веснік”. Гадуе сына і дачку. Аўтар кнігі прозы для падлеткаў “Пастка на рыцара” (2002). Ён апублікаваў у рэспубліканскіх часопісах “Першацвет”, “Бярозка”, “Маладосць” і “Полымя” да 20 апавяданняў. Таксама напісаў і надрукаваў аповесці: “Ведзьміна Тоня”, “Лёшкава каханне, або Віртуальнае дрэва рэальнасці” і “Усё цудоўна, або Урок бяспечнага сэксу”.
Юныя чытачы мелі магчымасць задаць госцю пытанні і выказаць свае ўражанні ад самастойна прачытанай апошняй аповесці Валерыя Гапеева “Доказ закона прыгажосці”. Вучняў-адзінаццацікласнікаў цікавіла, калі і чаму стаў аўтар пісаць па-беларуску, на якой мове размаўляе дома і на працы, як папулярызуе яе як пісьменнік у нашай краіне? Чаму галоўнымі героямі ў Гапеева з’яўляюцца менавіта падлеткі? Ці ёсць канкрэтныя прататыпы яго літаратурных герояў?
Спадабаўся маладой аўдыторыі клопат і боль Валерыя Мікалаевіча за стан беларускай літаратурнай мовы ў нашай краіне. У 2009 годзе ЮНЕСКА да ліку знікаючых моў аднесла, на жаль, і беларускую. Нягледзячы на двухмоўе ў нашай рэспубліцы, сёння ў грамадстве ўсё ж такі, на шчасце, назіраецца высокая нацыянальная самасвядомасць інтэлігенцыі, якая абрала ў большасці для сваёй работы менавіта беларускую літаратурную мову. Так і пісьменніку-земляку спачатку параіў пісаць па-беларуску супрацоўнік часопіса “Крыніца” Алесь Асташонак, а затым гэта стала патрэбай душы.
Магчымасць папулярызацыі беларускай мовы ў нашым грамадстве Валерый Гапееў бачыць, у першую чаргу, у якаснай літаратуры, у цікавай і займальнай падачы сюжэта ў мастацкім творы.
Пісьменнік цвёрда перакананы, што няма дзіцячых праблем – ёсць праблемы ў нашых дзяцей. І яны перажываюцца імі настолькі ж балюча, як і мы перажываем свае. На сустрэчы Валерый Мікалаевіч таксама прызнаўся, што героі яго апавяданняў і аповесцей у большасці не маюць рэальных і канкрэтных прататыпаў, а, хутчэй за ўсё, носяць у сабе абагульнены вобраз разнастайных людзей нашага грамадства.
Прыемна было назіраць, як пасля заканчэння літаратурнай вечарыны вучні-старшакласнікі доўга не адпускалі незвычайнага госця, сапраўднага грамадзяніна, філосафа, аднадумцу – сучаснага празаіка Валерыя Гапеева. Сапраўды, з разумным і таленавітым чалавекам ёсць аб чым пагаварыць.
Мікола ЖУКОВІЧ, дырэктар САШ №1,
г. Бяроза