Беларусь

“Дажынкі-2010” сёлета пройдзуць у Маларыце


Абласны фестываль-кірмаш “Дажынкі-2010” сёлета пройдзе ў Маларыце. У раённым цэнтры ў гэтыя дні ўзмоцненымі тэмпамі рыхтуюцца да правядзення свята і прыёму шматлікіх гасцей: будаўнікі з розных куткоў вобласці ўзводзяць тут новыя і рамантуюць старыя аб’екты, мяняюць камунікацыі, добраўпарадкоўваюць вуліцы і завулкі. Што ні дзень, горад мяняе сваё аблічча, набывае сучасны выгляд.
Ну, а гаспадары абласных дажынак, хлебаробы Маларытчыны, па традыцыі ўжо аднымі з першых у вобласці распачалі жніво. Услед за азімым ячменем, ураджайнасць якога па раёне склала 40 цэнтнераў з гектара, убіраюць рапс, на падыходзе – збожжавыя каласавыя. Сёлета на жніве будуць задзейнічаны 66 збожжаўборачных камбайнаў. Па словах намесніка начальніка райсельгасхарчу Сяргея Захожага, выпрацоўка на адзін агрэгат складзе 180 гектараў. Гаспадаркам раёна належыць убраць 12, 2 тысячы гектараў збожжавых і зернебабовых культур. Тэхніка і людзі для правядзення жніва ў аптымальныя тэрміны ёсць. Галоўнае, каб не здарылася якіх прыродных катаклізмаў накшталт моцных навальніц ці ўраганаў. А калі надвор’е будзе спрыяць хлебаробам, дык, нягледзячы на тое, што вясной давялося перасеяць больш за 3,5 тысячы гектараў загінуўшых азімых збожжавых, яны змогуць выйсці па валавым намалоце на леташні ўзровень і годна прадставіць раён у абласным спаборніцтве на жніве. Гэта абяцаюць і кантрольныя намалоты. Дарэчы, у мінулым годзе хлебаробы Маларытчыны атрымалі 39 тысяч тон зерня. А ПУСП “Савушкіна” было прысуджана першае месца ў вобласці па вытворчасці збожжа.
…На леташні паказчык у прыватным унітарным сельгаспрадпрыемстве плануюць выйсці і ў заключным годзе пяцігодкі. Дырэктар гаспадаркі Пётр Яцура, для якога сёлетняе жніво тут 31-е, гаворыць, што віды на ўраджай абнадзейваючыя, хоць уборачная плошча і меншая – частка азімых загінула зімой. Кіраўнік спадзяецца, што дасягнуць мінулагодняга намалоту ўдасца за кошт больш высокай ураджайнасці. Летась у “Савушкіна” на круг атрымалі па 42,9 цэнтнера збожжавых і зернебабовых. Калі ж нешта не атрымаецца са збожжавымі, дык кампенсаваць валавы збор тут плануюць зернем кукурузы, пасевы якой у параўнанні з мінулым годам павялічаны.
– Чым адметнае сёлетняе жніво ад папярэдніх 30-ці? – цікаўлюся ў Пятра Пракопавіча.
– Свае асаблівасці ёсць у кожным жніве. Што тычыцца сёлетняга, дык яно адметнае тым, што праходзіць у апошні год пяцігодкі, а гэта значыць, што ад яго вынікаў будзе залежаць выкананне прагнозных паказчыкаў і пяцігодкі ў цэлым, – гаворыць адзін з вопытнейшых кіраўнікоў сельгасвытворчасці. – А яшчэ ў нашым раёне восенню адбудуцца абласныя дажынкі, таму хацелася б годна паказаць на іх і сваю гаспадарку, і Маларытчыну таксама. Каб справіцца з гэтай задачай, у нас ёсць неабходная колькасць камбайнаў. Усе шэсць агрэгатаў укамплектаваны кваліфікаванымі кадрамі, людзьмі, якія па-сапраўднаму ўлюбёныя ў свой край і зямлю, на якой вырошчваюць хлеб. Не падвяло б толькі надвор’е.
А яно не-не, ды і ўстаўляе палкі ў колы камбайнаў: то навальніцай, то кароткачасовым дажджом. Вось і даводзіцца камбайнерам, а разам з імі і вадзіцелям, якія задзейнічаны на адвозцы зерня, чакаць, як у мінулы аўторак, калі падсохне пасля прайшоўшага ўранку дожджыка рапс. Яго ва ўрочышча Сітка на ўчастак Збураж прыехалі ўбіраць экіпажы ў складзе братоў Віталя і Генадзя Берчукоў, Аляксандра і Аляксея Ківачукоў. А астатнія камбайнеры рыхтаваліся да выезду ў поле на мехдвары з надзеяй на тое, што надалей надвор’е будзе радаваць іх толькі сонечнымі дзянькамі…
Надзея ЯЦУРА, “НТ”,
 
Маларыцкі раён.

“Дажынкі-2010” сёлета пройдзуць у Маларыце
Оцените статью

Добавить комментарий

Авторизация
*
*
Генерация пароля