Графіка і “графіці” на Савецкай

“VII Агульнапольскае біенале студэнцкай графікі. Познань 2011” экспануецца ў Брэсце да 10 снежня
Пасля наведвання гэтай выставы, арганізаванай Генеральным консульствам Рэспублікі Польшча ў Брэсце ў “суаўтарстве” з Мастацкім універсітэтам у Познані і Польскім інстытутам у Мінску, міжволі складваецца ўражанне, што не толькі Нясвіж сёлета культурная сталіца Беларусі. Прынамсі, ужо той факт, што біенале  выпаў шанс  убачыць толькі сталічным аматарам прыгожага і брастаўчанам, сам па сабе красамоўны.
Найлепшыя з лепшых (больш за 30 прац з 96 прадстаўленых на біенале) гасцююць у выставачнай зале на вуліцы Савецкай. Гэтыя перліны графічнага мастацтва  студэнтаў практычна ўсіх мастацкіх ВНУ Польшчы, якія прайшлі папярэдні конкурсны адбор, дадуць  багаты плён для разваг,  пазнаёмяць з класічнымі тэхнікамі і здзівяць смелымі эксперыментамі.
Нават калі вы далёкі ад мастацтва чалавек, а ў жывапісе аддаяце перавагу нацюрмортам,   пераацаніць запатрабаванасць  графікі на рынку мас-медыя і  дызайну немагчыма. Графічнае мастацтва – гэта ўльтрасучасна, і  за ім – будучыня. Таму біенале і выклікае такі інтарэс:  для творчай прасунутай моладзі-ўдзельнікаў – гэта шанс заявіць пра сябе, знайсці падтрымку  ў пачатку творчай дзейнасці. Ну, а ўсе наведвальнікі маюць гонар адкрыць новыя імёны, якія (хто ведае?) нясуць з сабой канцэптуальны прарыў і новае слова ў графіцы.
“Дакладнасць, тонкасць і безліч густу”, – так “пераклаў” паняцце “графіка” на зразумелую нятворцам  мову госць вернісажу Леў Алімаў, мастак-графік, ганаровы член Расійскай акадэміі мастацтваў. Як тут не згадзіцца, калі дастаткова проста параўнаць графіку ў выставачнай зале  і… так званыя “графіці”, якія “ўпрыгожваюць” Савецкую па-за сценамі экспазіцыі. Розніца відавочная, хоць, здавалася б, словы з аднаго кораня паходзяць. Аднак першае – высокае мастацтва, а другое – псаванне будынкаў. Каб іх адрозніваць – наведайце выставу.
Алёна САЦУТА, “НТ”.