Музею Стружскай СШ споўнілася 20 год

Час паказаў, што адметная роля ў патрыятычным выхаванні моладзі належыць школьным музеям. Пераканаўчым прыкладам такой работы стаў музей у Стружскай сярэдняй школе. Ён адкрыўся ў 1990 годзе як музей баявой славы. У 2008-м быў рэканструяваны ў гісторыка-краязнаўчы.
Зараз тут працуе малады настаўнік Міхаіл Дзенісовіч. Педагог вядзе ў школе краязнаўчы гурток, які наведваюць вучні 8 і 9 класаў. Сёлета яны сабралі шмат біяграфічных звестак аб ветэранах Вялікай Айчыннай вайны. Матэрыял сістэматызавалі і змясцілі ў асобны альбом. На стэндзе – фотаздымкі ўдзельнікаў вайны, якія нарадзіліся і жылі ў Струзе. Многіх з іх няма ў жывых, але засталася памяць. Сабраныя школьнікамі дакументы яскрава сведчаць аб мужнасці і гераізме землякоў. Дарэчы, гісторыі вёскі Струга ў перыяд Вялікай Айчыннай вайны прысвечаны цэлы стэнд.
Летам практычная работа гурткоўцаў актывізуецца. Дзеці ходзяць у краязнаўчыя паходы, якія і сёлета абавязкова прынясуць музею новыя знаходкі і матэрыялы.
Таццяна СЕГЕН,
Столінскі раён