Падзеі: кадравыя пытанні, выбары і патрыятызм

Кадравыя пытанні
Прэзідэнт Беларусі Аляксандр Лукашэнка 21 лютага разгледзеў кадравыя пытанні. Кіраўнік дзяржавы даў згоду на прызначэнне Рыгора Пратасавіцкага старшынёй Столінскага райвыканкама, Івана Турчака – генеральным дырэктарам адкрытага акцыянернага таварыства «Баранавіцкае вытворчае баваўнянае аб’яднанне».
Званне – генерал
21 лютага Прэзідэнт Беларусі Аляксандр Лукашэнка падпісаў указы аб прысваенні воінскіх і спецыяльных званняў. У прыватнасці, начальніку ўпраўлення Камітэта дзяржбяспекі па Брэсцкай вобласці Ігару Бусько прысвоена чарговае воінскае званне генерал-маёра.
Беларускія назіральнікі
16 дэпутатаў Палаты прадстаўнікоў Нацыянальнага сходу Беларусі прымуць удзел у міжнародным назіранні за выбарамі Прэзідэнта Расійскай Федэрацыі, якія пройдуць 4 сакавіка. У назіранні паўдзельнічаюць таксама і прадстаўнікі беларускага Цэнтрвыбаркама.
Салдатамі не нараджаюцца
Круглы стол «Салдатамі не нараджаюцца – салдатамі становяцца» прайшоў 22 лютага на базе 38-й асобнай гвардзейскай Венскай Чырванасцяжнай мабільнай брыгады. У ім прынялі ўдзел камандны састаў і ваеннаслужачыя вайсковай часці, а таксама актывісты грамадскіх аб’яднанняў «Беларуская рэспубліканская піянерская арганізацыя» і «Беларускі рэспубліканскі саюз моладзі». Пасля абмену думкамі і віншавальнай праграмы госці наведалі музей брыгады, пазнаёміліся з умовамі службы і быту ваеннаслужачых.
За патрыятычнае выхаванне
Шэраг сродкаў масавай інфармацыі Брэстчыны сталі пераможцамі рэспубліканскага творчага конкурсу на лепшае асвятленне пытанняў будаўніцтва і развіцця Узброеных Сіл Рэспублікі Беларусь, актыўны ўдзел у патрыятычным выхаванні насельніцтва. Дыпломам І ступені і першай прэміяй адзначана Бярозаўская раённая газета «Маяк», дыпломамі Міністэрства інфармацыі – «Полесская правда» (г. Пінск) і «Навіны Палесся» (г. Столін), а таксама тэлерадыёкампанія «Пінск», граматамі Міністэрства абароны – абласная газета «Заря» і раённая «Кобрынскі веснік». Віншуем, калегі!

Алімпійскі конкурс
Прадстаўніцтва НАК Беларусі ў Брэсцкай вобласці аб’яўляе аб пачатку абласнога творчага конкурсу дзіцячага малюнка «Лондан алімпійскі». Да ўдзелу запрашаюцца ўсе жадаючыя ва ўзросце ад 10 да 14 гадоў. Апошні тэрмін падачы матэрыялаў – 31 мая 2012 года. Галоўная тэма конкурсу – Алімпійскія гульні ў Лондане вачыма дзяцей. Пераможцы атрымаюць прызы.
У падарунак – прэм’ера
КУП «Брэстаблкінавідэапракат» павіншаваў прадстаўнікоў моцнай паловы чалавецтва з Днём абаронцаў Айчыны. Мерапрыемства з нагоды свята адбылося ў сераду ў малым зале кінатэатра «Беларусь». Запрошаным вайскоўцам, ветэранам Вялікай Айчыннай вайны, салдатам-афганцам супрацоўнікі прадпрыемства прэзентавалі прэм’еру стужкі «Жнівень. Восьмага» рэжысёра Джаніка Фазіева.