Ад Ніны СВІЦЮК, галоўнага рэдактара раённай газеты “Голас часу”, г.Маларыта:
– Калі чалавек здаровы, дык есці можна ўсё, што хочацца. Адзінае абавязковае, на маю думку, правіла – ежа павінна быць умеранай. Прынамсі, дыету падкажа сам страўнік, толькі трэба навучыцца яго разумець, а не спрабаваць заглушыць кожны яго сігнал гарой прадуктаў. Страваванне павінна быць разнастайным. Не варта зацыклівацца на якім-небудзь адным тыпе харчавання, бо арганізму патрэбны розныя вітаміны, мікраэлементы, тлушчы, амінакіслоты і інш. Не лянуйцеся эксперыментаваць са стравамі, знаходзіць новыя смакі. А пачаць можна хоць бы з прыгатавання салата “Браняносец”.
Інгрэдыенты нашай стравы: курыная грудка (300-400г), сыр (400 г), яйкі (2-3 шт.), маянэз (каларыйнасць выбірайце па сваім гусце), грэцкія арэхі (100-150г), галінка зялёнага вінаграду. Колькасць прадуктаў можна павялічыць ці зменшыць у залежнасці, на якую кампанію вы рыхтуеце страву.
Курыную грудку смажым, астуджваем і дробна рэжам. Яйкі адварваем, арэхі здрабняем, ягады вінаграду разразаем уздоўж, сыр дзярэм на тарцы. На блюда (варыянт – глыбокая талерка, салатніца) выкладаем слаямі: курыцу, сыр, яйкі. Кожны слой прапітваем маянэзам і паўтараем 2-3 разы. Апошні слой таксама змазваем маянэзам, пасыпаем арэхамі і выкладаем вінаград зверху ўніз да краю блюда.
Атрымаецца і прыгожа, і смачна. Частуйцеся на здароўе!
от8 февраля, 2019