Беларусь

Што знаходзіцца у дзявочай касметычцы?


Быць прыгожай – сапраўднае майстэрства. Каб адчуваць сябе на ўсе 100 працэнтаў, некаторым дзяўчатам неабходны цэлы чамадан розных касметычных сродкаў. Іншыя робяць стаўку на натуральнасць – і карыстаюцца касметыкай па мінімуму. Што дапамагае нам выглядаць прывабна? Якая самая важная рэч у дзявочай касметычцы? З такімі пытаннямі “НТ” звярнулася да прадстаўніц прыгожай палавіны горада над Бугам.
Кацярына ШАРАНКОВА, адміністратар студыі
танца “Me and You”:
– У маёй касметычцы заўсёды ёсць туш для вейкаў. Без яе амаль не выходжу з дома. І калі на макіяж, асабліва ранішні, не хапае часу, вочы патрэбна выдзеліць – гэта ўсё ж такі люстэрка душы. У асноўным карыстаюся імпартнай касметыкай, часцей за ўсё купляю туш маркі “MaybelIine”. Што да айчынных вытворцаў – падабаецца марка “Lux”.
Ірына ФЁДАРАВА,
псіхолаг:

– Я вельмі люблю круціцца перад люстрам, а маленькае люстэрка заўсёды маю пры сабе. Яго можна дастаць у любы момант і пераканацца, што з макіяжам ці прычоскай усё ў парадку. Калі ж не – падправіць недахопы дапамогуць вільготныя сурвэткі. Менавіта гэтыя рэчы павінны абавязкова быць у дзявочай касметычцы. У маёй яны, безумоўна, ёсць. А яшчэ, упэўнена, ні адна дзяўчына не выйдзе на вуліцу без падфарбаваных вуснаў. Памада ці бляск таксама павінны быць пад рукой.
Таццяна ДУБОЎСКАЯ, навучэнка абласнога ліцэя імя П. М. Машэрава:
– Правілы нашага ліцэя выключаюць яркі макіяж, а вось рукі заўжды павінны быць акуратнымі. Для гэтага нашу з сабою пілачку для пазногцяў – яна выручае ў любую хвіліну, дый не займае многа месца.
Лічу, што прыгожая дзяўчына павінна мець прыгожыя пазногці. Насамрэч, рукі могуць многае сказаць пра чалавека…
Алёна БОЙКА, 
педагог:
– Вельмі падабаецца, калі ад чалавека прыемна пахне, – няважна, мужчына гэта ці жанчына. Я таксама стараюся выклікаць у навакольных толькі добрае ўражанне. Выконваць пастаўленую мэту цудоўна дапамагае парфум. Усюды, куды б ні ішла, бяру яго з сабою. Часам нашу нават некалькі відаў духоў – усё залежыць ад сітуацыі і ад памераў сумкі.
Запісала Ніна ЛЕАНАВЕЦ, “НТ”,
Фота аўтара

Што знаходзіцца у дзявочай касметычцы?
Оцените статью

Добавить комментарий

Авторизация
*
*
Генерация пароля