Беларусь

  • Главная
  • Навiны
  • Сёння стартуе XI Рэспубліканскі экалагічны форум. Сярод удзельнікаў – дэлегацыя Брэстчыны

Сёння стартуе XI Рэспубліканскі экалагічны форум. Сярод удзельнікаў – дэлегацыя Брэстчыны


З   23 па 25 жніўня больш за 500 дэлегатаў з розных куточкаў Беларусі і гасцей з блізкага замежжа будуць абмяркоўваць надзённыя праблемы аховы прыроды, павышэння экалагічнай адукаванасці людзей. Актуальнасці мерапрыемству, між іншым, дадае і той факт, што 2013-ы год абвешчаны ў Садружнасці незалежных дзяржаў Годам экалагічнай культуры і аховы навакольнага асяроддзя. Прычым з падобнай іныцыятывай выступіла менавіта Беларусь, якая сёлета старшынствуе ў СНД.
– Пад дэвізам экалагічнага выхавання прайшлі і рэгіянальныя этапы форума – разнастайныя акцыі ды конкурсы адпаведнай скіраванасці, – паведаміў напярэдадні Аляксей Лячэк, намеснік начальніка аддзела прававой работы і каардынацыі кантрольнай дзейнасці абласнога камітэта прыродных рэсурсаў і аховы навакольнага асяроддзя. – Знайшлося шмат удзельнікаў, неабыякавых да стану нашай планеты – як з ліку звычайных жыхароў вобласці, так і з ліку арганізацый. Але хацелася б яшчэ больш людзей розных узростаў далучыць да карыснай справы, тым больш што пераможцы абласных конкурсаў у межах форуму маюць шанс паспрачацца за лаўры ў фінале і нават трапіць у лік мацнейшых.
Апошніх, дарэчы, у Бабруйску па традыцыі ўзнагародзяць дыпломамі, прызамі і грашовымі прэміямі. На жаль, сёлета берасцейцам не хапіла літаральна трошачкі, каб падняцца на вышэйшыя прыступкі п’едэстала. Аднак тое, што прадстаўнікі вобласці стабільна дэманструюць добрыя вынікі, не можа не радаваць: у нас тры другія месцы. Адзначаны Баранавіцкі станкабудаўнічы завод,  філіял ЗАТ “Атлант” – за лепшае ўладкаванне месцаў масавага адпачынку ў межах водаахоўных зон водных аб’ектаў. Па выніках фотаконкурсу “Гэта твая зямля” другімі таксама сталі Сяргей Рабаў (намінацыя “Прыгажосць роднай прыроды”) сярод прафесіяналаў і Мікіта Чыркун (намінацыя “Экалогія і чалавек”) – сярод навучэнцаў.
У склад дэлегацыі Брэстчыны на XI Рэспубліканскі экалагічны форум увайшлі 49 чалавек.
– Гэта не толькі прадстаўнікі абласнога камітэта прыродных рэсурсаў і кіраўнікі раённых інспекцый, – падзяліўся Сяргей Мычко, начальнік аддзела арганізацыйнай і кадравай работы абласнога камітэта. – Улічваючы тое, што гэты год прысвечаны экалагічнай культуры і адукацыі, акцэнт у нашай камандзе зроблены менавіта на педагогаў – лепшых выкладчыкаў БрДУ імя А.С. Пушкіна, Палескага аграрна-экалагічнага інстытута Нацыянальнай Акадэміі навук Буларусі, Брэсцкага дзяржаўнага тэхнічнага ўніверсітэта, дырэктараў гімназій і школ, устаноў адукацыі з экалагічным ухілам. Іх удзел у падобных мерапрыемствах нават не аспрэчваецца, бо гэтыя людзі працуюць з падрастаючым пакаленнем, ад якога будзе залежаць наша будучыня, у тым ліку і экалагічная.
У складзе дэлегацыі – і тыя, хто непасрэдна ўплывае на экалагічную сітуацыю ў вобласці: прадстаўнікі жыллёва-камунальных служб. Акрамя гэтага, з мэтай папулярызацыі зялёных турыстычных маршрутаў паўдзельнічаюць у форуме і кіраўнікі рэспубліканскіх заказнікаў “Прыбужскае Палессе” і “Сярэдняя Прыпяць” – Мікалай Лукашук і Віктар Бяленка. Ужо заўтра падчас выставы “Сучасныя тэхналогіі ў вобласці аховы і выкарыстання прыродных рэсурсаў” яны прэзентуюць відэафільмы і па-дзеляцца з калегамі вопытам у галіне турызму.
І хоць кожны год гарачая экалагічная трохдзёнка, якой па сутнасці з’яўляецца форум, мяняе месца дыслакацыі, тэматыку правядзення, ды нязменным застаецца жаданне пастаянных удзельнікаў голасна абмяркоўваць праблемы навакольнага асяроддзя. У гэтым сугуччы разнастайных тэмбраў можна ўлавіць і голас Брэстчыны, які дзень за днём становіцца ўсё мацней.
Тамара ВАСІЛЬКОВА, “НТ”.

Сёння стартуе XI Рэспубліканскі экалагічны форум. Сярод удзельнікаў – дэлегацыя Брэстчыны
Оцените статью

Добавить комментарий

Авторизация
*
*
Генерация пароля