Беларусь

  • Главная
  • Навiны
  • У гімназіі №5 адчыніўся адноўлены краіназнаўчы музей

У гімназіі №5 адчыніўся адноўлены краіназнаўчы музей


Больш за 10 гадоў назад на базе школы №2 г. Брэста, у якой паглыблена вывучалі іспанскую мову, была створана гімназія №5. Яна прадоўжыла традыцыі сваёй папярэдніцы. Сёння ў гімназіі вывучаюцца англійская, нямецкая, польская, кітайская, іспанская і італьянская мовы. Але вылучаецца гімназія не толькі сваім моўным ухілам. Яшчэ ў 1980 годзе ў школе быў створаны музей інтэрнацыянальнай дружбы “Амістад” (у перакладзе з іспанскай – “сяброўства”).
За час існавання музея ў ім сабралі шмат цікавых экспанатаў, яго наведалі госці з розных краін свету. Сярод іх – касманаўты Юрый Віктаравіч Раманенка і Арнальда Тамайа Мендэс. Яны пакінулі ў музеі касмічную ручку, эмблемы з касцюма кубінскага касманаўта і іншыя рэчы. Папаўнялі музей экспанатамі вучні і іх бацькі, настаўнікі і госці гімназіі. Напрыклад, пасольства КНР у Беларусі перадало некалькі рэчаў для размяшчэння ў экспазіцыі, прысвечанай культуры Кітая.
Сёння нас сустракае ўжо адноўлены краіназнаўчы музей. Ён складаецца з дзвюх частак: у першай – экспазіцыі, прысвечаныя Рэспубліцы Беларусь, Брэсту і гімназіі, у другой паказаны краіны, мовы якіх вывучаюць гімназісты. Зала абсталявана рассоўнымі экспазіцыямі, якія расказваюць аб Вялікабрытаніі, Польшчы, Германіі, КНР, Італіі, Мексіцы і іншых дзяржавах, а таксама зменнымі міні-экспазіцыямі і вітрынамі, за якімі размешчаны цікавыя экспанаты. Падчас экскурсіі можна праглядаць разнастайныя відэаматэрыялы.
Рэканструкцыя была праведзена за бюджэтны кошт. Для рамонту спатрэбіліся сучасныя ідэі і прапановы, выкарыстоўваліся найноўшыя матэрыялы. У выніку ў даволі невялікім памяшканні разгарнуліся сучасна аформленыя і з вялікай колькасцю экспанатаў экспазіцыі. Нельга не адзначыць дружную работу калектыву гімназіі, які прыклаў шмат намаганняў для пераўтварэння музея.
У музея “Амістад” цікавая гісторыя, яго наведвалі знакамітыя людзі з розных краін. У яго скарбніцы знаходзіцца больш за 1000 арыгінальных экспанатаў з розных краін свету. На сённяшні дзень краіназнаўчы музей 5-й гімназіі не мае аналагаў у вобласці і яго па праву можна назваць славутасцю Брэста.
Ірына ХМЕЛЬ,
студэнтка Інстытута журналістыкі БДУ.
Фота аўтара

У гімназіі №5 адчыніўся адноўлены краіназнаўчы музей
Оцените статью

Добавить комментарий

Авторизация
*
*
Генерация пароля