Беларусь

Брэст чакае “Стыль-2011”


На дэманстрацыю сваёй калекцыі ў намінантаў “Школы моды” будзе 5 хвілін
Завяршыўся прыём заявак на штогадовы абласны конкурс маладых мадэльераў і дызайнераў адзення “Стыль”. Нагадаем, што фэшн-форум пройдзе ў 13-ы раз. Гараджане з нецярплівасцю чакаюць яркага фінальнага спаборніцтва, якое, трэба адзначыць, добра ўдавалася ў папярэднія гады арганізатарам – аддзелу па справах моладзі, упраўленню адукацыі, упраўленню культуры аблвыканкама, УП “Салон-Стыль”, УП “Крэатыў-Студыя”, абласному камітэту ГА “БРСМ”, а таксама Цэнтру сучаснага стылю і моды “UNIVERSAL MODELS” (Белдзяржуніверсітэт).
– Сёння ў Беларусі ёсць тры гарады-лідары моднай індустрыі, – падзяліўся сваімі разважаннямі дызайнер Саша Варламаў на закрыцці “Стыля-2010”. – Вядома ж, гэта Мінск, бо ён з’яўляецца сталіцай і прыцягвае да сябе творчых людзей. Другое месца раней, дзякуючы свайму тэхналагічнаму ўніверсітэту, займаў Віцебск. Сёння першы пасля Мінска – Брэст. Усё, што задумваецца ў Мінску і Віцебску, у жыццё рэалізуецца ў Брэсце. Гэты горад паступова становіцца “кухняй” моды. Тут таленавітыя людзі робяць адзенне, якое будуць насіць не толькі ў Беларусі, але і за яе межамі.
Удзельнікі конкурсу “Стыль-2011” будуць спаборнічаць у дзвюх намінацыях: “Школа моды” і “Майстар моды”. У першай сіламі памераюцца навічкі – студэнты, навучэнцы вучылішчаў, а ў другой – сапраўдныя профі. У мінулым годзе свята моды і прыгажосці гледачам фінальнага шоу падарылі 30 канкурсантаў. Сёлета жадаючых пакарыць журы на чале з мэтрам беларускай моды Сашай Варламавым значна больш, але ў фінал трапяць толькі самыя-самыя. Дарэчы, кастынгі і фітынгі конкурсу завершацца заўтра, а 19 лютага пачнуцца рэпетыцыі і актыўная падрыхтоўка да паказаў на сцэне.
Абласны  “Стыль” праводзіцца ў рамках Рэспубліканскага конкурсу-фестывалю “Мельница моды”. Пераможцы атрымаюць запрашэнне ў сталіцу. Як паказала практыка мінулых гадоў, брэсцкія “стылягі” здольныя заваяваць і міжнародныя подыумы. Брэсцкі конкурс адкрыў шлях у высокую моду такім маладым дызайнерам, як Наталля Ляхавец, Вольга Барадзей, Мая Бярсеньева.
Акрамя таго, будуць выбраны дзве “Супермадэлі” – жаночая по-дыумная і мужчынская стандартная. Дэманстраваць модныя калекцыі будуць юнакі і дзяўчаты ва ўзросце ад 14 да 25 гадоў.
– Сёлета кастынгі праводзіліся сярод мадэльных агенцтваў, – расказала начальнік аддзела арганізацыйна-кадравай работы абласнога камітэта ГА “БРСМ” Святлана Цупрунюк. – Паспрабуем стварыць запамінальнае святочнае і непадобнае на іншыя шоу.
Самае моднае мерапрыемства года пройдзе 24 лютага ў абласным грамадска-культурным цэнтры. Завяршальны акорд зімы абяцае быць ну вельмі стыльным!..
Вольга СВІРЫДОВІЧ, “НТ”.

Брэст чакае “Стыль-2011”
Оцените статью

Добавить комментарий

Авторизация
*
*
Генерация пароля