Лекцыя ад практыкаў

Сакрэтамі прафесіі з будучымі “акуламі пяра” падзяліліся ветэраны брэсцкай журналістыкі
Адна справа – слухаць тэорыю на лекцыях. Зусім іншая, калі тую ж тэорыю, але пераплеценую з практыкай, знітаваную з асабістым вопытам, расказваюць людзі, якія ў прафесіі, як кажуць, сабаку з’елі. Тут табе і прыклады пераканаўчыя, і падказкі, як весці сябе з людзьмі ў розных сітуацыях, і аб’ектыўныя ацэнкі абранай спецыяльнасці. Ды ўвогуле, заўсёды цікава паслухаць, як гэта было ў іншы час, у іншых палітычна-грамадскіх умовах. Вось чаму ідэю сустрэчы са старшынёй абласной суполкі Беларускага саюза журналістаў Георгіем Тамашэвічам і ветэранам журналістыкі Берасцейшчыны Аркадзем Бляхерам  група студэнтаў філфака нашага ўніверсітэта – будучых журналістаў – ахвотна падтрымала.
У аўдыторыі сабраліся аднадумцы. Маладым цікава было паслухаць разважанні старэйшых таварышаў пра журналістыку, сутнасць прафесіі, маральныя вартасці, якімі трэба кіравацца ў рабоце. Успаміны Аркадзя Бляхера ўразілі. Ветэран Вялікай Айчыннай вайны, чалавек, які аддаў любімай справе ўсё жыццё, расказаў аб сваім шляху ў журналістыку, успамінаў памятныя сустрэчы, любімых герояў сваіх матэрыялаў, дзяліўся з намі жыццёвымі назіраннямі. У Аркадзя Маісеевіча само сабою атрымалася правесці майстар-клас і паказаць нам, пачаткоўцам у журналістыцы, як трэба шукаць цікавы сюжэт, як сабраць факты, пабудаваць неардынарны аповяд пра жыццё, як абыходзіцца са словам і чаму трэба памятаць аб адказнасці перад чытачом і сваім героем.
Парады ад практыкаў заўсёды каштоўныя. Вось чаму сустрэчы з ветэранамі журналістыкі і сённяшнімі работнікамі СМІ вырашана зрабіць традыцыйнымі.
Дзмітрый ШЫФЕРШТЭЙН,
студэнт БрДУ імя А.С. Пушкіна.