Працаваць рупліва, думаць пра будучыню

У СВК “СНІТАВА-АГРА”, ПАЛЯПШАЮЧЫ ЯКАСЦЬ ПРАДУКЦЫІ, ПАВЯЛІЧВАЮЦЬ ЯЕ АБ’ЁМЫ
Дасягненняў у вытворчасці мяса, малака, рыбы, птушкі не атрымаеш без паўнавартасных кармоў. Разуменне гэтага і падштурхнула кіраўніцтва СВК “Снітава-Агра” генеральнай лініяй развіцця сваёй гаспадаркі вызначыць павелічэнне аб’ёмаў выпуску прадукцыі і павышэнне яе якасці праз укараненне сучаснага энергаэфектыўнага абсталявання і стварэнне дастатковай кармавой базы, якая адпавядае дасягненням сельскагаспадарчай навукі.
Значны крок у гэтым кірунку быў зроблены яшчэ ў недалёкім мінулым, калі правялі рэканструкцыю далучанага да гаспадаркі стратнага птушніка і павялічылі магутнасці малочнатаварнай фермы. Другі важны крок у справе паляпшэння якасці – будаўніцтва ў гэтым годзе і ўвод у эксплуатацыю зернеачышчальна-сушыльнага комплексу беларускай кампаніі “Лідсельмаш” (на здымку).
“Дзякуючы новаму абсталяванню сельгаспрадпрыемства не толькі даб’ецца высокай ступені ачысткі сыравіны, але і забяспечыць належную захаванасць зерня, – перакананы старшыня СВК Анатоль Гліннік. – На працягу двух гадоў я вывучаў гэтае пытанне і прыйшоў да высновы, што будаўніцтва такога аб’екта ў гаспадарцы вельмі неабходна. Мы выбралі айчыннае абсталяванне. Сушылка зніжае вільготнасць зерня з 22 да 14 працэнтаў пры прадукцыйнасці  больш за 40 тон у гадзіну. А яшчэ ў гаспадарцы пабудавалі новае збожжасховішча на 5 тысяч тон зерня. Цяпер праблемы па захаванні збожжа і кукурузы ў сельгаспрадпрыемства няма. З’явілася магчымасць круглы год выкарыстоўваць сваё ж зерне для прыгатавання камбікармоў”. Эканамісты разлічылі: абсталяванне акупіцца на працягу трох гадоў. Чаканы эканамічны эфект складзе да аднаго мільярда рублёў у год.
Будаўніча-мантажныя работы ў СВК “Снітава-Агра” не спыняюцца: толькі завяршаюць рэалізацыю аднаго праекта – бяруцца за наступны. Цяпер, напрыклад, у цэнтры ўвагі – рэканструкцыя цэха па вытворчасці камбікармоў. Ён паспрыяе павелічэнню аб’ёмаў вытворчасці якаснай жывёлагадоўчай прадукцыі і птушкі. Магутнасць цэха – 5 тон камбікармоў у гадзіну.
“Мы бяром на ўзбраенне вопыт перадавых гаспадарак нашай краіны, таму пры рэканструкцыі камбікормавага цэха зрабілі стаўку на найноўшую тэхналогію. Што гэта нам дасць? Па-першае, палепшым якасць прадукта, па-другое, знізім сабекошт, дзякуючы памяншэнню энергазатрат. Мы выйдзем на кругласутачны рэжым работы, а магутнасць цэха дасягне 40 тысяч тон выдатнага камбікорму ў год”, – тлумачыць кіраўнік СВК “Снітава-Агра”. Аб’яўлены тэндар па закупцы абсталявання. Рэканструкцыю камбікормавага цэха плануецца завяршыць у першым квартале 2011 года. Тут ствараецца не толькі сучасная вытворчасць, але і выдатныя ўмовы для  работнікаў: бытавы блок, месцы адпачынку, санблок. Будзе і свая сучасная лабараторыя па камбікармах.
Старшыня сельгаскааператыва Анатоль Гліннік цвёрда перакананы: быць гаспадаром на зямлі нялёгка, але дасягнуць эфектыўнай сельгасвытворчасці можна, калі рупліва працаваць і думаць пра будучыню.
Марыя ФЕДАРУК, “НТ”,
Іванаўскі раён.
Фота Валерыя МІХАЛЬЧУКА.