У Баранавічах перад Новым годам уручылі ключы ад кватэр 45 сем’ям

Выдатны падарунак да Новага года атрымалі жыхары Баранавіч

27 снежня ў Баранавіцкім гарвыканкаме ўрачыста ўручылі дагаворы найму 45 сем’ям, якія атрымалі кватэры ў новым сацыяльным доме па вуліцы Дамейкі, 13/1 у мікрараёне Бараўкі. Асаблівую значнасць падзеі надавала прысутнасць старшыні  аблвыканкама Канстанціна Сумара, які і ўручаў гараджанам гэты важны дакумент.
Вялікая зала гарвыканкама ледзь змяшчала віноўнікаў урачыстасці. Многія навасёлы прыйшлі сюды цэлымі сем’ямі. А сем’і ж немаленькія! Сем – толькі шматдзетных, у якіх выхоўваюцца трое і больш дзяцей.
У 45-кватэрнай дзевяціпавярхоўцы 21 кватэра сацыяльная. Права на сацыяльнае жыллё атрымалі дзеці-сіроты і дзеці, якія засталіся без апекі бацькоў, інваліды і ўдзельнікі Вялікай Айчыннай вайны, пацярпелыя ў час ліквідацыі аварыі на Чарнобыльскай АЭС.
У будаўніцтва гэтага дома ўкладзена больш за 7 мільярдаў рублёў бюджэтных сродкаў.
– Дзяржава ідзе на такія беспрэцэдэнтныя крокі, таму што будаўніцтва сацыяльнага жылля актуальнае, – падкрэсліў старшыня гарвыканкама Віктар Дзічкоўскі.
Якаснае жыллё з поўнай аздобай узвялі будаўнікі будтрэста №25. Генеральным падрадчыкам выступіла БУ-111, свой уклад унеслі і УВТК, і 145-е, 172-е, 186-е ўпраўленні трэста. За год у Бараўках вырас яшчэ адзін прыгожы будынак.
– Збылася самая вялікая наша мара. Але ёсць яшчэ адна. Кажуць, пад Новы год жаданні збываюцца, – радасна зазначыла адна з навасёлаў Аксана Лоўкес, звяртаючыся да прадстаўнікоў улады. – Вельмі хацелася б мець у Бараўках і дзіцячы садок.
– Будзе, будзе і дзіцячы садок, – запэўніў Канстанцін Сумар. – У будучым годзе, максімум – у 2013-м сваіх дзетак паведзяце ў новенькі дзіцячы сад.
Святлана ГІЛЬ,
г. Баранавічы.
Фота Міхаіла КАШКО.