У Міжнародны дзень урача Брэсцкая цэнтральная паліклініка прыняла гарадскую канферэнцыю медыкаў

Дзеля выхавання гонару за сваю прафесію і ўзняцця яе прэстыжу ў Міжнародны дзень урача ў Брэсцкай цэнтральнай паліклініцы прайшла гарадская канферэнцыя медыцынскіх работнікаў

Прафесіянальнае свята медыцынскія работнікі ў Беларусі адзначаюць летам, а ў першы панядзелак кастрычніка далучаюцца да мерапрыемстваў, прымеркаваных да Міжнароднага дня ўрача. Між іншым, ініцыятыва адзначаць гэта свята паслядоўнікаў Гіпакрата належыць Сусветнай арганізацыі аховы здароўя і ўстанавілі яго для таго, каб згуртаваць урачоў усяго свету, падштурхнуць іх да актыўных дзеянняў. Міжнародны дзень урача падтрымалі і ў калектыве Брэсцкай цэнтральнай паліклінікі – у гэтай установе аховы здароўя прайшла канферэнцыя.
Адкрываючы яе, галоўны ўрач Мікалай Красоўскі ўзгадаў поспехі ў развіцці медыцыны ў Брэсце. Асабліва падкрэсліў, як важна, што медыцынская сям’я папоўнілася –
60 маладых спецыялістаў прыйшлі ў гэтым годзе, 11 з іх – на станцыю хуткай медыцынскай дапамогі. Нарэшце зрушылася праблема недахопу спецыялістаў вузкага профілю, хоць канчаткова яна пакуль не вырашана. Па словах Мікалая Васільевіча, з пастаўленымі задачамі брэсцкія медыкі ведаюць, як справіцца: сістэма аховы здароўя можа працаваць якасна і быць даступнай.
Гарадская канферэнцыя мела і навукова-даследчы, пазнавальны характар. Распавесці аб папулярных, легендарных асобах, якія ўнеслі значны ўклад у медыцыну, было даручана тым, хто сёння працягвае справу Гіпакрата. Напрыклад, намеснік галоўнага ўрача УАЗ “Брэсцкі абласны анкалагічны дыспансер” Валерый Сушко расказаў пра Мікалая Мікалаевіча Аляксандрава, яго ролю ў развіцці анкалогіі Беларусі. Мала хто ведае, што сёння працуе анкалагічны цэнтр імя М.М. Аляксандрава. Пра Варвару Аляксандраўну Кашавараву-Рудневу, якая ўнесла вялікі ўклад у развіццё айчыннай гінекалогіі, і Карла Іванавіча Гібенталя (ён у XIX стагоддзі прыдумаў і запатэнтаваў спосаб лячэння пераломаў, які выкарыстоўваецца да гэтага часу, у тым ліку і брэсцкімі ўрачамі) расказаў калегам загадчык хірургічнага аддзялення Брэсцкай цэнтральнай паліклінікі Аляксандр Лысковіч.
А закончылася канферэнцыя заахвочваннем ганаровымі граматамі і падзячнымі лістамі. Так адміністрацыя адзначыла лепшых медыцынскіх работнікаў у Міжнародны дзень урача.
Сабіна ГАРАЕВА,
студэнтка БрДУ імя А.С. Пушкіна.