У расійскай Цюмені на ХХ злёце “кіжаватаўцаў” пабывала берасцейская дэлегацыя

Гэты рух бярэ свой пачатак з 70-х гадоў мінулага стагоддзя. Лілія Асіпенка, нязменны кіраўнік “Рэспублікі Кіжаватавец”, прыехала ў Брэсцкую крэпасць. Гэтая падзея стала лёсавызначальнай для многіх людзей. Вярнуўшыся ў Цюмень са жменькай берасцейскай зямлі, Лілія Афанасьеўна заснавала маладзёжна-патрыятычны рух у гонар аднаго з самых вядомых абаронцаў крэпасці лейтэнанта Андрэя Кіжаватава.
З таго часу злёты традыцыйна прахо-дзяць у Брэсце, Мардовіі, на радзіме Кіжаватава – у Пензенскай вобласці, а таксама ў Цюмені. Менавіта апошняй выпала прымаць юбілейнае свята, прысвечанае 70-годдзю гераічнай абароны крэпасці.
У складзе брэсцкай дэлегацыі былі старшыня савета ветэранаў Ленінскага раёна Павел Панасюк, абаронца крэпасці Пётр Кацельнікаў, старшы навуковы супрацоўнік мемарыяла “Брэсцкая крэпасць-герой” Антаніна Кацельнікава, старшыня пярвічнай арганізацыі ветэранаў крэпасці Людміла Шавырова і маёр пагранічнай службы Віталь Лісавенка. У злёце прынялі ўдзел і сённяшнія пагранічнікі, выхаванцы ваенна-патрыятычных гурткоў, навучэнцы школ і гімназій.
Нашы ветэраны паўдзельнічалі ў мітынгу-рэквіеме ля помніка Кіжаватаву, наведалі некалькі цюменскіх школ, дзе разам з настаўнікамі і вучнямі правялі “круглыя сталы”, паглядзелі дакументальныя фільмы, абмяняліся вопытам арганізацыі мерапрыемстваў. “Прыемна было бачыць, на якім высокім узроўні сёлета былі арганізаваны Кіжаватаўскія дні, – адзначае Павел Несцеравіч. – Амаль у кожнай школе існуюць патрыятычныя атрады, якія шануюць традыцыі сваіх дзядоў”.
Брэсцкая дэлегацыя наведала таксама беларускае консульства, юнацкі ваенна-спартыўны цэнтр “Град”, пабывала на экскурсіі ў горадзе Табольску, сустрэлася з ветэранамі ФСБ Расіі, паўдзельнічала ў іншых святочных мерапрыемствах.
Дзмітрый ШЫФЯРШТЭЙН,
студэнт БрДУ імя А.С. Пушкіна.